[EDITORIAL] Push back laban sa disinformation

Mangiyak-ngiyak si Krizette Chu nang sitahin siya ng mga kongresista sa harap ng mga camera na nagbobrodkast live. Sabi ni Chu — na may 250,000 followers sa Facebook — nakaamba raw ang mass resignation ng pulis at military, sa aftermath ng paglabas ng arrest warrant ng International Criminal Court laban kay dating presidente Rodrigo Duterte — bagay na mariing itinanggi ng mga pinuno ng mga pulis at sundalo.

Sabi pa ni Chu, “I am maintaining that I am speaking the truth of the impressions made on social media. That’s why I included ‘daw (supposed)’ — these were impressions.”

Iginisa rin si MJ Quiambao, na buong-kumpiyansang sinabi sa kanyang mga post na hoax lang daw ang extrajudicial killings. 67,000 ang followers ni MJ sa Facebook. 

Sabihin kaya nila ‘yan sa harap ng tiyo ni Kian delos Santos, ang menor-de-edad na pinatay sa tabi ng babuyan sa gitna ng drug war ni Duterte? Siya ang kabataang kitang-kita sa video na kinakaladkad ng mga pulis. Walang ibang masabi si Kian kundi, “‘Wag po, may test pa ako bukas,” at walang kamalay-malay na ilang sandali pa’y paluluhurin siya at babarilin sa ulo. 

Tulad ni Chu, mangiyak-ngiyak din si MJ na humingi ng paumanhin. (BASAHIN: At House hearing, pro-Duterte vloggers apologize for ‘fake news,’ rude social media post)

Nakakatuksong sabihin sa mga pro-Duterte vloggers: sorry guys, “shit happens,” to quote ang nagtatagong arkitekto ng tokhang na si Senador Bato dela Rosa. Nakatutukso ring sabihin na “when it rains, it pours” — “it” referring to karma. Maliban sa pagkakakulong ni Tatay Digong niyo sa The Hague, nakaamba rin ang impeachment laban sa anak niyang si Bise Presidente Sara Duterte.

Pero hindi pangungutya ang pakay natin kundi pagsusuri — kung hindi man panghihikayat. 

Marami sa atin ang nagulat na marami pala tayong kaibigang pro-Duterte — batay na rin sa mga post nila sa social media. Nawindang tayo dahil hindi natin sila kinakitaan ng ganitong sentimyento sa gitna ng karimlan ng Duterte years.

At naniniwala sila sa disinformation na hindi ligal ang pag-aresto kay Duterte, na may TRO ang Korte Suprema laban sa pag-aresto, na cover-up daw ang pagdetine sa dating presidente sa pagkakaaresto kay First Lady Liza Araneta Marcos sa Estados Unidos, at mismong si US President Donald Trump daw ay nagpaabot ng suporta.

Ano ang gasolinang nagpaliyab sa simpatiya kay Rodrigo Duterte online? Pera. Ang mga YouTubers na nagpo-post ng kasinungalingan tungkol sa Duterte-ICC issue ay kumikita ng nasa P20,000 bawa’t araw. Sa madaling salita, ginagantimpalaan ng social media platforms ang paglalason nila sa information landscape dahil nati-trigger nila ang algorithms na nagpapa-viral sa kasinungalingan nila. (BASAHIN: [DECODED] YouTubers posting lies, propaganda on Duterte-ICC issue can earn up to P20,000 daily]

Sila ang mga ahente ng disinformation. May pagkakaiba sila sa mga sinserong sumisimpatya at naniniwalang biktima si Duterte. Sila ‘yung na-trap na sa web of lies, at naipit na sa echo chamber at mind conditioning ng Duterte propaganda.

Basahin ang payo ng aming Head of Community na si Pia Ranada. Sa gitna ng divisiveness at tumitinding polarization, itong si Ranada — na tumanggap ng pinakamalupit at pinakabulok na atake ng DDS — ang nagbubukas ng pinto tungo sa pagkakaunawaan. (BASAHIN: [Be The Good] How to talk to someone who believes in disinformation about Duterte’s arrest)

Marami sa mga nakaaaninag ng katotohanan ay napi-PTSD (post-traumatic stress disorder) sa resurgence ng pro-Duterte vloggers sa social media. Nanunumbalik ang mga taong meron sa ating nakatatanggap ng 90 hate messages per minute.

Marami sa atin ang bumabalik sa dating patterns ng behavior: duck, take cover, hide. Ngayong eleksiyon, may tulog ang demokrasya kapag ganyan pa rin ang response natin sa hamong ito sa ating lipunan.

Itaga natin, sa darating na eleksiyon, gagamitin ng kampong Duterte bilang referendum sa Marcos administration ang isyu ng Duterte arrest.

Pero hindi si Duterte ang dapat maging pokus ng eleksiyon — dapat maging pokus ang kabuhayan, presyo ng bilihin, pagwaksi sa korupsiyon, West Philippine Sea, at edukasyon, among others.

Huwag na nating payagang mahalal ang mga hindi karapat-dapat. Balikan natin ang mga batayang sukatan ng mahusay at ka-elect-elect na kandidato. Sabi sa pag-aaral ng Nerve, integrity at honesty ang pinakamahalagang angkin ng isang kandidato. ‘Yan ang ating common ground. – Rappler.com