د صربیا چارواکو د استرالیا درې اتباع ونیول
دغه درې استرالیایان د بلګراد د یوه هوټل په سالون کې د ۶۲۰ زره ایرو په ارزښت د کوکائینو له یوې کڅوړې او د په زرګونو ډالرو معادل اسیایي او اروپایي پیسو سره ونیول شول.
پولیس وایي، نیول شوي کسان د هغو څه کم یو اعشاریه درې ټنه کوکائینو له کشف او ضبط سره تړاو لري چې په تېر اپریل میاشت کې په سیډني کې په یوې چینایي کښتۍ کې وموندل شول.
دا د استرالیا په تاریخ کې تر ټولو زیات کوکائین دي چې ضبطېږي.
د استرالیا پولیسو ویلي وو چې دغه کوکائین چې په تور بازار کې یې ارزښت شاوخوا ۴۰۰ میلیون ډالر اټکل شوی، له مخکې په تولید شویو اوسپنېزو بلاکونو کې ځای پرځای شوي وو.
په صربیا کې د دغو استرالیایانو له نیولو وروسته د استرالیا پولیسو په کانبیرا او د نیو ساوټ ولز «New South Wales» په درېیو ښارونو کې په هغو پنځو کسانو پسې د لټون عملیات ترسره کړل چې د نیولو امر یې صادر شوی دی.