Թուրքմենստանի նախագահը որդուն նշանակել է երկրի փոխարտգործնախարար
Թուրքմենստանի նախագահի որդին՝ Սերդար Բերդիմուհամեդովը, նշանակվել է երկրի արտաքին գործերի փոխնախարար: РИА Новости-ի հաղորդմամբ՝ այս մասին ուրբաթ տեղեկացրել է թուրքմենական հեռուստատեսությունը:
Համապատասխան հրամանագիրն ստորագրել է երկրի նախագահ Գուրբանգուլի Բերդիմուհամեդովը:
Սերդար Բերդիմուհամեդովը ծնվել է 1981 թվականին: Ավարտել է Թուրքմենստանի գյուղատնտեսական համալսարանը՝ ինժեներ-տեխնոլոգ մասնագիտությամբ: Այնուհետև ուսանել է ՌԴ ԱԳՆ Դիվանագիտական ակադեմիայում, ինչպես նաև Ժնևի Անվտանգության քաղաքականության կենտրոնում:
Մարտի 25-ին անցկացված խորհրդարանական ընտրություններում վերջինս ընտրվել է Մեջլիսի պատգամավոր: