“Шум бола – 2018”
“Ўзбеккино” миллий агентлиги, Тошкентдаги Гёте институти, Германиянинг «Schlingel» болалар ва ўсмирлар учун фильмлар халқаро фестивали дирекцияси ҳамкорлигида ташкил этилган мазкур фестиваль Ўзбекистон билан Германия ўртасидаги узоқ йиллик маданий-маърифий ҳамкорликнинг амалий ифодасидир.
Бу йил юртимизда бешинчи бор ўтказилаётган фестивалда дунёнинг турли мамлакатлари киноижодкорлари томонидан болалар ва ўсмирлар учун ишланган киноларнинг энг саралари тақдим этилмоқда. 2-6 май кунлари бўлиб ўтадиган «Шум бола – 2018» фестивалига умумтаълим мактабларининг юқори синф ўқувчилари, педагоглар, ота-оналар таклиф этилган. Унда болалар ҳаёти билан боғлиқ бўлган турли йўналиш ва жанрдаги фильмлар намойиш этилмоқда.
– Ушбу фестивалда мактабимиз ўқувчилари доим иштирок этади, – дейди пойтахтимиздаги 203-умумтаълим мактаби ўқитувчиси Нилуфар Жўраева. – Эзгулик, дўстлик, аҳиллик каби умуминсоний ғоялар сингдирилган бу кинолар ўқувчиларимизнинг дунёқараши, ўзини тутиши, вазиятни тўғри баҳолай олишида муҳим аҳамият касб этади.
Фестиваль германиялик киноижодкорларнинг «Қалбимни тош қил» бадиий фильми намойиши билан бошланди.