Rusiyede mahküm etilgen Qırım sakini Sayfullayev sağlıq ile problemalarından şikâyet etti

Rusiyede Aqyardaki «Hizb ut-Tahrir işi» boyunca mahküm etilgen qırımtatar Ferat Sayfullayev, onı aprelniñ eñ soñunda ziyaret etken Kirov vilâyetindeki Cemiyet közetüv komissiyasınıñ (CKK) azalarına sağlığından şikâyet etti. Bunı Qırım.Aqiqatqa komissiyanıñ azası Artur Abaşeyev bildirdi.

Abaşeyev: «Sağlıq vaziyetinden şikâyetleri bar edi. Neden şikâyet etilgenini daa tafsilâtlı aytıp olamayım – bu tibbiy sırdır… Koloniyada kerekli ilâclar yoq», – dedi.

O, Sayfullayevniñ Kirov vilâyetindeki 17 nomeralı tertipke qoyucı koloniyanıñ territoriyasında «odinoçka»da – bir kişilik ücre tipinde odada tutulğanını bildirdi.

CKK azası: «İhtimal ile onı, türlü tertip bozuluvlarını uydurıp ve tutuluv muddetini uzatıp, ceza muddetiniñ soñuna qadar anda tutacaqlar», – dedi.

Onıñ aytqanına köre, Sayfullayevniñ hasiyetnamesinde, koloniyanıñ içki tertibine boysunmaq istemegeni qayd etile.

Aq-uquq qorçalayıcısı: «İşniñ materiallarında psihologik hasiyetnamesi bar edi. Onda, Feratnıñ açıq surette ifade etilgen liderlik hasiyetlerine malik olğanı, er angi toplulıqtaki özüni tutuv qaidelerine emiyet bermegeni ve, ondan ğayrı, koloniyanıñ içki tertibine emiyet bermemege meyil etkeni bildirile», – dep qayd etti. 

Daa evel Rusiye Adliye nazirligi Sayfullayevni Ukrainanıñ qıtadaki qısmına alıp berilmesini red etti.

2017 senesiniñ sentâbrinde Rostov-na-Donu şeerindeki Şimaliy Kavkaz okrugınıñ arbiy mahkemesi uküm çıqardı. Oña binaen «Hizb ut-Tahrir işi» boyunca qabaatlanğan Aqyar sakinleri Ferat Sayfullayev, Rustem Vaitov ve Nuri Primovğa umumiy rejimli tertipke qoyucı koloniyada beşer yıl berildi.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ diniy alâmetke köre taqip etilgenlerini tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd ete.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.