Երևանի կոմունալ ոլորտը շարունակում է փոխքաղաքապետի ենթակայության տակ մնալ, ընթացիկ աշխատանքներն է համակարգում Կամո Արեյանը. քաղաքապետի մամուլի քարտուղար
Երևանի քաղաքապետի մամուլի քարտուղար Հակոբ Կարապետյանը հաստատում է մամուլի տեղեկությունը, որ կոմունալ ծառայության ոլորտի համակարգումը հանձնվել է Երևանի նախկին փոխքաղաքապետ, այժմ քաղաքապետի խորհրդական Կամո Արեյանին՝ հստակեցնելով, որ դա ամենևին չի նշանակում, որ այդ մասով լիազորությունները փոխքաղաքապետից անցել են խորհրդականին:
«Քանի որ մենք տրանսպորտի բարեփոխումների իրականացման կարևորագույն փուլ ենք մտնում, և բարեփոխումները բավականին մեծ ծավալի ուժերի կենտրոնացում են պահանջում, քաղաքապետը հանձնարարել է Հրաչյա Սարգսյանին զբաղվել փաթեթի մշակմամբ: Քանի որ հասկանալի է, որ առաջին տեղակալի համակարգման ոլորտում են գտնվում քաղաքի կառավարման մի շարք բնագավառներ, քաղաքապետն առաջարկել է խորհրդական Կամո Արեյանին զբաղվել կոմունալ տնտեսության հարցերով: Սա չի նշանակում, որ Հրաչյա Սարգսյանից վերցվել է այդ ոլորտը, կոմունալ ծառայության բարեփոխումների, ծրագրերի իրականացման աշխատանքները շարունակում է համակարգվել, բայց ընթացիկ աշխատանքները համակարգում է Կամո Արեյանը»,-Tert.am-ի հետ զրույցում ասաց Կարապետյանը:
Խոսնակը նշեց, որ, ըստ էության, մինչ այս էլ Կամո Արեյանը զբաղվել է այս հարցով, մասնավորապես, ձնամաքրման աշխատանքների ժամանակ է նա ներգրավված եղել, նաև ապրիլի 24-ի կամ տոնական ինչ-ոչ միջոցառումների ժամանակ քաղաքի մաքրությունը պահելու հարցերում, որը նրա անձնական ուշադրության ներքո գտնվելով, արդյունավետ իրականացվել է:
Հարցին, թե քաղաքապետի խորհրդականի գործառույթների մեջ մտնո՞ւմ է նման ոլորտներով զբաղվելը, և տեղի՞ն է դիտարկումը, որ երբևէ քաղաքապետի խորհրդականը չի կատարել քաղաքապետի առաջին տեղակալի լիազորությունները, Կարապետյանը հիշեցրեց, որ նախկինում՝ մինչև Հայկ Մարությանի պաշտոնավարումը, քաղաքապետն ուներ 9 խորհրդական և 5 օգնական, որոնք որոշակի ոլորտներ էին համակարգում, մինչդեռ հիմա ունի 3 խորհրդական: «Այդ բոլոր 9 խորհրդականները համակարգում էին մեկական ոլորտ, օրինակ` խորհրդական Ալիկ Գևորգյանը՝ տրանսպորտի ոլորտը, խորհրդական Վանո Վարդանյանը՝ ներդրումների, արտաքին կապերի ոլորտը, խորհրդական Գրիգոր Սարիբեկյանը՝ զորակոչային հարցերի և մշակութային հացերի ոլորտը և այլն, և հասկանալի է, որ այն աշխատանքը, որը նախկինում կատարում էին խորհրդականները, հիմա ավելի մեծ է ծանրաբեռնվածությունները քաղաքապետի և տեղակալների վրա, և միանգամայն նորմալ է, որ որևէ ոլորտի կուրացիա կամ մի մասը փոխանցվի խորհրդականներին»,-ասաց նա:
Ինչ վերաբերում է թերթի այն տեղեկություններին, որ սա ոչ թե Հայկ Մարությանի որոշումն է, այլ Նիկոլ Փաշինյանի, ինչից Մարությանը դժգոհ է, Հակոբ Կարապետյանը պատասխանեց, թե դա, իհարկե, բամբասանք է:
«Ուզում եմ հիշեցնել, որ այն ժամանակ, երբ հայտնի դարձավ, որ քաղաքապետ Հայկ Մարությանը խորհրդական էր նշանակել Կամո Արեյանին, ինչ-որ հակառակ կարծիքներ էին հնչում, որ ի հեճուկս իր թիմի ցանկությանը՝ Մարությանը պահել է Արեյանին: Իրականում ո´չ մեկն է ճիշտ, ´ոչ էլ այս մյուսը: Քաղաքապետը, գնահատելով պարոն Արեյանի փորձն ու գիտելիքները, ինստիտուցիոնալ հիշողությունը, այսպես ասած, նրան առաջարկել է պաշտոնավորման հենց սկզբից զբաղեցնել խորհրդականի պաշտոնը, և հասկանալի է, որ նաև այս որոշումն է կայացրել քաղաքապետը, և առհասարակ քաղաքի կառավարմանը վերաբերող բոլոր որոշումները կայացնում է քաղաքապետը՝ իր թիմի հետ խորհրդակցելով»,-ասաց նա:
Նշենք, որ «Հրապարակ» օրաթերթը գրել էր, թե փոխքաղաքապետ Հրաչյա Սարգսյանը կոորդինացնում էր Երևանի կոմունալ ոլորտը (հոսանք, գազ, աղբահանություն, սանմաքրում, ջրամատակարարում և այլն)։ Օրերս նրան զրկել են լիազորությունների զգալի մասից՝ կոմունալի համակարգումը հանձնելով Երևանի նախկին փոխքաղաքապետ, այժմ քաղաքապետի խորհրդական Կամո Արեյանին։ Երբևէ քաղաքապետի խորհրդականը չի կատարել քաղաքապետի առաջին տեղակալի լիազորությունները։