Чырлуу окуялардан улам өкмөттүн аппарат жетекчисинин орун басары иштен алынды
Маалыматка караганда, бул чечим «КТ Мобайл» жоопкерчилиги чектелген коому, улуттук уюлдук байланыш операторун түзүү, ЕККУ менен чогуу жүзөгө ашырылып жаткан долбоор - "Ачык Өкмөт" улуттук форумунун катчысына байланышкан окуяларды эске алуу менен кабыл алынды.
Буга чейин “Ачык өкмөт” улуттук форумунун кызматтан кеткен катчысы Иманкадыр Рысалиевдин премьер-министр Мухаммедкалый Абылгазиевдин бир тууган бажасы экени ачыкка чыгып, катуу сынга алынган. 18-майда Абылгазиев ЕККУнун өкүлчүлүгүнө кайрылып, аны бул кызматынан чакыртып алууну сунуштаган. Кийинчерээк ал иштен кеткен.
Иманкадыр Рысалиевдин дарегине "КТ Мобайл" компаниясы боюнча да дооматтар айтылып жатат. Бирок Абылгазиев бул айтылгандар азырынча ырастала электигин билдирген.
Талашка себеп болгон «КТ Мобайл» - 2003-жылы түзүлүп, бирок ушул күнгө чейин иштебей келген «Кыргызтелекомго» караштуу ишкана.
Ал «Мегаком» брендин алып жүргөн «Альфа Телеком» менен жарым жылдай мурдараак келишим түзгөн. Ага ылайык «Мегаком» өнөктөшүнө 345 миллион сом төлөп бермек. Кийин эки компаниянын ортосунда келишпестик пайда болгону ачыкка чыккан.
Парламентте «КТ Мобайл» компаниясынын ишин иликтөө боюнча депутаттык комиссия түзүлгөн. (NT)