Летні музычна-турыстычны сезон адкрываецца ў Траецкім прадмесці
У Траецкім прадмесці 25 мая ўрачыста адкрыецца летні культурна-турыстычны сезон. Кварталы гістарычнага цэнтра сталіцы напоўняцца жывой музыкай, тут рэгулярна будуць праводзіцца розныя інтэрактыўныя і творчыя мерапрыемствы.
„Адміністрацыя раёна сумесна з КУП „Менгардаведка” прадаўжаюць работу па развіцці і павышэнні турыстычнай прывабнасці аднаго з самых маляўнічых і ўнікальных куткоў Менска. Менчукі і госці сталіцы ўжо змаглі прывыкнуць да з’яўлення тут фудкортаў, выставак-кірмашоў, зон актыўнасці ў рамках святкавання Дня горада і нядаўняга Дня Перамогі. На гэты раз атмасфера свята ў Траецкім прадмесці атрымае пастаянную прапіску. Наколькі гэта апраўдана – пакажа час і водзывы наведвальнікаў, аднак пакуль плануецца, што яго ўнутраныя дворыкі, размешчаныя тут музеі і кафэ, Траецкая набярэжная да канца верасня змогуць прымаць і радаваць гасцей па выхадных”, – адзначылі арганізатары.
Кожную суботу і нядзелю з 12.00 да 22.00 наведвальнікаў чакае шырокая культурная праграма. Тут будзе выступаць тэатр жывых скульптур „Студыя залатога рэжысёра”, а прыватны тэатр лялек, святла і цені „Дом сонца” і вулічны тэатр „Галактыка” арганізуюць спектаклі пад адкрытым небам. Кінакампанія „Ілюзіён” на працягу турыстычнага сезона рыхтуецца прадставіць серыю карцін пад адкрытым небам з 21.00 да 22.00. Плануецца, што ў адрозненне ад Верхняга горада, тут будуць дэманстраваць дакументалістыку і гістарычнае кіно, а старажытныя сцены прадмесця стануць палатном для паказу фільмаў. Таксама тут выступяць вулічныя выканаўцы жывой музыкі ў рамках праекта „Пешаходка”, артысты мінскага клуба фокуснікаў і цырка „Крэсіва”, школы ірландскага танца Dance Spirit, трайбл-студыі і шоу-балета „Альтана”, фэнтэзі-шоу Dragon.
Традыцыйнымі для пляцоўкі ў Траецкім прадмесці стануць тэматычныя святочныя праграмы ў рамках дзяржаўных свят і знамянальных дат з канцэртамі жывой музыкі, гандлем-фудкортам „Троіцкія гасцінцы” і выстаўкай-кірмашом сувенірнай прадукцыі, выяўленчай і дэкаратыўна-прыкладной творчасці „Святочная скарбонка” на Траецкай набярэжнай. Зрабіць экскурс у часе і акунуцца ў атмасферу Мінска ў самым пачатку яго гістарычнага развіцця дапамогуць вулічныя спектаклі тэатра батлейкі ад гасцёўні Галубка, фотазоны і інтэрактыў ад размешчаных у прадмесці музеяў – беларускай літаратуры, М.Багдановіча, прыроды і экалогіі, праса. Асаблівы шарм падарожжу па старадаўніх кварталах надасць выстаўка-арэнда мастацкіх і антыкварных касцюмаў, якія можна будзе не толькі прымераць, але і адправіцца ў іх у прагулку па прадмесці.
Наведвальнікаў таксама чакае разнастайнасць гандлёвых кропак, розныя сюрпрызы ад уладальнікаў мясцовых кафэ і рэстаранаў. Акрамя таго, правесці вольны час з карысцю мінчан запрашае сталічны цэнтр „Карты госця” па вул. Багдановіча, 11, дзе кожны другі чацвер месяца па 14 чэрвеня пройдуць кіналекторыі „Прас. Гісторыя развіцця ад каменнага веку да нашых дзён”, а на працягу ўсяго турыстычнага сезона можна будзе азнаёміцца з тэматычнымі выстаўкамі работ вядомых мастакоў. Напрыклад, па 24 чэрвеня ў экспазіцыі палотны В.К.Бялыніцкага-Бірулі, будзе таксама прадстаўлена серыя жывапісу „Успаміны” ў гасцёўні „Сустрэча з мінулым” у антыкварнай і мастацкай галерэі „Дар’ян”.
Выставачныя экспанаты будуць абнаўляцца па меры камплектавання. У дзень урачыстага адкрыцця культурна-турыстычнага сезона 25 мая на пляцоўцы ў Траецкім прадмесці разгорнецца пленэр Беларускай дзяржаўнай акадэміі мастацтваў, прысвечаны творчасці вядомага беларускага мастака М.В.Данцыга.