Չնայած հարուցված քրեական գործերին՝ Կոտայքի մարզպետն ու Աբովյանի քաղաքապետը պատրաստ են համագործակցել
Կոտայքի մարզպետը իշխող «Քաղաքացիական պայմանագիր» կուսակցությունից է, Աբովյանի քաղաքապետը վայելում է ընդդիմադիր «Բարգավաճ Հայաստան» կուսակցության աջակցությունը: Այսօր ավելի վաղ լուրեր էին տարածվել, որ մարզպետը մի քանի դատական գործ է հարուցել Աբովյանի քաղաքապետի դեմ, մասնավորապես՝ Աբովյանի մուտքի մոտ տեղադրված I love Abovyan ցուցանակի համար, որը, իբր, խախտում է «Լեզվի մասին» օրենքը:
Պետրոսյանը հայտարարություն է տարածել, որում հստակեցնում է՝ ԲՀԿ աջակցությունը վայելող Գևորգյանը մեղադրվում է 67 միավոր համայնքային սեփականության հողամասերի դասական աճուրդի գործընթացում իրավախախտումներ թույլ տալու մեջ: Այս մասով քրեական գործ է հարուցվել, որը նախ հանցակազմի բացակայության պատճառաբանությամբ մերժվել է Կոտայքի մարզային վարչության Կոտայքի բաժնի հետաքննության բաժանմունքի կողմից, այնուհետև կրկին քրեական հանցագործության գնահատական է ստացել Գլխավոր դատախազի կողմից: Այժմ Գևորգյանը մեղադրվում է պաշտոնեական լիազորությունները չարաշահելու մեջ:
«Մենք ներկայացրել ենք բավականին խոսուն փաստեր, առնվազն գոնե հանցափորձի առումով և ակնկալում էինք ավելի խորը քննություն և հանգամանալից պարզաբանում քրեական գործ չհարուցելու պարագայում: Առնվազն օրենքի տեսակետից մեր լիազորությունների և իրավունքների մեջ էր բողոքարկելը, ինչի արդյունքում քրեական գործ հարուցվեց», - ասում է մարզպետը:
Չնայած Աբովյանի քաղաքապետի ընտրությունների լարված ֆոնին, քվեարկությանը նախորդած աղմկահարույց դեպքերին և փոխադարձ մեղադրանքներին՝ Պետրոսյանը վստահեցնում է՝ ԲՀԿ աջակցությունը վայելող Գևորգյանի հետ անձնական խնդիրներ չունի և պատրաստ է ողջ ծավալով համագործակցել նրա հետ․ - «Խոսքը ինստիտուտների մասին է, անձերի մասին չէ: Որևէ կոնտակտ չենք ունեցել: Բացարձակ խնդիր չեմ տեսնում, բայց նաև քաղաքական գնահատականներ եմ անում, իրավական գործընթացներն ընթացքում են և ինքս նաև հետամուտ եմ կանխելու հնարավոր ինքնիրավչությունները համայնքների ղեկավարների և ավագանու անդամների կողմից»:
Ինքը՝ Գևորգյանը, համաձայն է ՔՊ-ական մարզպետի հետ, նա «Ազատությանը» հայտնեց՝ իրենց միջև անձնական պայքար չկա․ - «Սա ինստիտուտների համագործակցությունա՝ համայնք, մարզպետարան, կառավարություն և մենք ոչ միայն պատրաստ ենք, այլ նաև պարտավոր ենք համագործակցել»:
Իսկ Աբովյանի քաղաքապետի ընտրություններին նախորդած ամենաաղմկահարույց դեպքի՝ ՔՊ-ական թեկնածուի նախընտրական շտաբի ղեկավարի տան և մեքենայի հրկիզման գործը բացահայտելու ուղղությամբ, ըստ Գևորգյանի, օրինապահ մարմինները հետևողական աշխատանք են կատարում․ - «Իմ հորդորն ու խնդրանքն ա եղել իրավապահ մարմիններին, որ օր առաջ բացահայտվի, որովհետև ես էն անգամ էլ եմ ասել՝ դա զազրելի, կեղտոտ, սրիկա արարք ա եղել»:
Իր հերթին մարզպետ Ռոմանոս Պետրոսյանը նշում է․ ֊ «Ես գիտեմ, որ օրինապահ մարմիններն ամբողջ ծավալով իրականացնում են այդ քննչական գործընթացները, հետաքննությունը, բայց այս պահին քանի դեռ հանդես չեն եկել որևէ հայտարարությամբ և ես զերծ կմնամ որևէ դիտարկումից»:
Աբովյանի բնակիչներն էլ «Ազատության» տեսախցիկի առաջ վստահեցնում էին՝ քաղաքում լարվածություն չկա: