Gürcistandaki narazılıqlar: yaralanğan 52 kişi hastahanede qala
İngorokva hastahanesiniñ hirurgiya bölüginde ameliyat olğan doquz hasta buluna.
Ekimlerniñ aytqanına köre, bazarertesi künü episi tibbiy müessiseden çıqa bile, dep haber ete Gürcistannıñ cemaat yayınlayıcısı.
Diger yaralanğanlar aqqında aytılsa, 11 hasta «New hospitalde» qala. Hastahane malümatına köre, hastalardan iç birisiniñ ayatı içün telükeli ola bilecek yaraları yoq. Daa dört hasta Guduşauri hastahanesinde buluna. Hastahanede bildirgenlerine köre, olarnı künniñ soñuna qadar çıqarmaq kerekler.
Gürcistannıñ paytahtı Tifliste iyünniñ 20-nde başlağan narazılıq aktsiyaları devam ete. Rusiye Devlet dumasınıñ deputatı Sergey Gavrilov Tifliste keçirilgen Parlamentlerara pravoslavlıq assambleyasınıñ sessiyasını Gürcistan parlamentiniñ spikeri yerinde oturıp açqan soñ narazılıqlar başladı.
Gürcistannıñ bir çoq vatandaşı Gavrilovnıñ Tifliske kelmezden evel Abhaziya ve Cenübiy Osetiya Gürcistannıñ separatist regionlarınıñ Rusiye tarafından mustaqil devletler olaraq tanılmasınıñ lâğu etilmeycegine dair laflarına açuvlandı.
İyünniñ 20-nde narazılıq aktsiyaları politsiya ile çatışmalarğa çevirildi. İyünniñ 21-nde bu adise-vaqialar sebebinden Gürcistan parlamentiniñ spikeri İrakliy Kobahidze istifağa çıqtı. Onıñ istifası miting iştirakçileriniñ talaplarından biri edi.
Narazılıq aktsiyalarınıñ iştirakçileri iç işler naziriniñ istifasını ve nevbetten tış parlament saylavlarınıñ belgilenmesini talap ete.
Rusiye prezidenti Vladimir Putin iyülniñ 8-nden itibaren Rusiye ava şirketlerine rusiyelilerni Rusiyeden Gürcistanğa taşımağa vaqtınca yasaq etken buyruqnı imzaladı. Turizm operatorları ve turizm agentliklerine vatandaşlarğa Gürcistan yollanmalarını satmamağa tevsiye etile.
Gürcistanda Rusiye turizm operatorlarınıñ 1500 müşterisi buluna. Olar alğan biletlerine köre qaytacaqlar, dep bildirdi Rosturizm matbuat hızmeti cumaertesi künü «İnterfaks-Turizm» Rusiye portalına.