У фінале мужчынскага адзіночнага разраду згуляюць Надаль і Мядзведзеў
Данііл Мядзведзеў (5 АТП) і Рафаэль Надаль (2) сустрэнуцца ў вырашальным матчы мужчынскага адзіночнага разраду „US Open”.
У паўфіналах расеец у трох партыях абыграў балгарына Грыгора Дзімітрава (78) – 7:6, 6:4, 6:3, а іспанец таксама ў трох сэтах быў мацней за італьянца Матэа Берэціні (25) – 7:6, 6:4, 6:1. Фінал адбудзецца 8 верасня.
Арбітр Аляксей Кульбакоў у сярэдзіне першага тайма прымусіў гаспадароў змяніць форму
7 верасня праходзіў матч 19-га тура чэмпіянату Беларусі сярод каманд першай лігі. „Рух” прымаў НФК. У першым тайме адбыўся цікавы момант. На 28-й хвіліне матчу суддзя Аляксей Кульбакоў папрасіў гаспадароў змяніць форму: замест футболак бірузовага колеру арбітр прапанаваў гульцам надзець майкі больш цёмнага колеру, каб не злівацца з формай сталічнай каманды.
Галкіпер менскага „Дынама” Юнас Энрот – горшы ў КХЛ па адсотку сэйваў
Брамнік менскага „Дынама” Юнас Энрот займае апошняе месца ў КХЛ па адсотку адбітых кідкоў сярод калегаў па амплуа. У трох матчах швед адвёў толькі 84,3 адсотка пагроз. Каэфіцыент надзейнасці Энрота таксама не ўражвае – 3,76 прапушчаных шайб у сярэднім за гульню. Гэта трэці паказчык у лізе з канца. З галкіпераў, якія правялі як мінімум два матчы, лепшым з’яўляецца рыжанін Крыстэрс Гудлеўскіс: 97,6 адсотка сэйваў.
Паўднёвакарэец Кім Геона праходзіць прагляд у берасцейскім «Дынама»
На праглядзе ў берасцейскім «Дынама» знаходзіцца паўднёвакарэйскі футбаліст Кім Геона. Ён выступае на пазіцыі цэнтральнага паўабаронцы. Раней гуляў у карэйскай камандзе «Ыйджонбу Квандонг».
Анастасія Верамеенка прыпыніла кар’еру да студзеня 2020 года
Цэнтравая зборнай Беларусі Анастасія Верамеенка прыпыніла кар’еру. Баскетбалістка збіраецца адпачываць да студзеня 2020 года. Верамеенка плануе падтрымліваць форму з „Гарызонтам” з Менскай вобласці. Магчыма, 32-гадовая спартсменка будзе ўдзельнічаць у некаторых матчах беларускай каманды. У мінулым сезоне Анастасія абараняла колеры турэцкага “Фенербахчэ”.
Ян Каравай, Беларускае Радыё Рацыя
Фота championat.com