Rusiye 35 ukrainalını teslim ete – Feygin
Onıñ aytqanına köre, Ukrainağa 24 cenk esiri olğan ukrainalı deñizci, rejissör Oleg Sentsov, jurnalist Roman Suşçenko, «Qırım diversantları» davası boyunca mahküm etilgen Yevğen Panov, faal Oleksandr Kolçenko, Birinci çeçen cenkinde iştirak etkeni içün mahküm etilgen Stanislav Klıh ve Mıkola Karpük, terrorizmde qabaatlanğan 21 yaşında Pavlo Ğrıb ve Oleksiy Sizonoviç, faal Volodımır Baluh, 21 yaşında student ve bloger Artur Panov ve qırımtatar faali Edem Bekirov yollanılacaq.
Sentâbrniñ 7-nde saba ukrainalı cenk esiri deñizcilerini qorçalav gruppasınıñ koordinatorı Nikolay Polozov deñizcilerni azat etüv esnası «başlandı», dep bildirdi.
Soñki aftaları kütleviy haber vastaları Rusiye ve Ukraina «33-ke 33» ya da «35-ke 35» deñişüv (Rusiye Deñiz uquqı boyunca halqara mahkemeniñ qararı esasında azat etilecek Qara deñizde zapt etilgen ukrainalı deñizcilerni de bu formulağa kirsete) aqqında añlaştı, dep bildirgen edi.
Ukraina Rusiyege cinayet işlegeninden şübheli sayılğan bir sıra insannı teslim ete bile. Olarnıñ arasında – devlet hainliginde qabaatlanğan «RİA Novosti-Ukraina» haber agentliginiñ reberi Kirill Vışinskiy ve Donbasta MH17 sefer uçağınıñ tüşürilüv tahqiqatında müim şaat sayılğan «DNR» gruppirovkasınıñ eski terrorcısı Vladimir Tsemah.