«Ğalebe mıtlaqa olacaq». Server Mustafayev Rusiye elçihanesi ögüne aktsiyalarğa kelmege çağırdı
«Bugünki mahkemede, Cenübiy okrugınıñ arbiy mahkemesinde keçken oturışuvlarda olğan qanunsızlıq ve adaletsizlikni köz ögüne alıp, dünyanıñ aq qorçalayıcıları ve siyasetçilerini daa faal ve neticeli areket yapmalarına davet etem. Daa sert ve ciddiy oluñız. Bunıñ neticesi mıtlaqa olacaq», – dep tüşüne Mustafayev.
O, bütün dünyanı «küreşini toqtatmayıp, istegen netice olğanına qadar faalligini quvetleştirmesine» çağıra.
«Er bir siyasiy mabüs, er bir siyasiy mabüsniñ qorantasını unutmamağa ve hatırlamağa çağıram: bizden ğayrı, 100-ge yaqın siyasiy mabüs, Qırımda yüzlernen ve biñlernen semetdeşimiz apishanede kibi qala», – dedi o.
Mustafayevniñ qayd etkenine köre, er afta ya da er ay memleketlerniñ Rusiye elçihaneleri ögüne «adları, fotoresimleri, qorantalarınıñ adlarınen çıqmalı; bu adden aşır istilâ unuttırmamalı».
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Bağçasaraydaki ekinci «Hizb ut-Tahrir davasınıñ» mabüsleri sıñırlav tedbiriniñ uzatıluvına qarşı berilgen istinaf arizası baqılğanda penceresi ve avalandıruvı olmağan 3 metr kârelik odada qaldı.