Aqmescitteki ekinci «Hizb ut-Tahrir davasınıñ» mabüsi daa 3 ayğa SİZOda qaldırıldı
«Qırım Cumhuriyeti ve Aqyardaki FSB idaresiniñ tahqiqatçısı Vitaliy Vlasov sıñırlav tedbirini uzatmağa rica etti. O, Eskender Suleymanov yapa bilecek areketler aqqında aytıp, Aqmescitniñ tahqiqat izolâtorında tutmaqtan ğayrı başqa bir çare olmağanını körmegenini qayd etti. Prokuror Sergey Korneyev, tahmin etilgeni kibi, onıñ muracaatına qol tuttı», – dep tarif etti imayeci.
Advokatnıñ bildirgenine köre, mahkemede Eskender Suleymanov dördünci Jeneva şartnamesiniñ normaları qullanılsın dep talap etti, oña binaen, o, işğal etilgen topraqta mecbur qalğan şahıs sayıla.
«Men imayeci olaraq halqara uquq normaları milliy qanunlardan üstün olğanını ayttım, amma delillerimiz temelsiz tanıldı», – dep añlattı advokat.
2019 senesi iyünniñ 10-nda FSB hadimleri Aqmescit rayonınıñ Mamaq (Stroganovka) köyünde Eskender Suleymanovnı – 2019 senesi martnıñ 27-nde kütleviy tintüvler vaqtında tutulğan «Qırım birdemligi» faali Ruslan Suleymanovnıñ qardaşını tutıp aldı.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.