ევროკავშირის წარმომადგენლობა საქართველოს კონსტიტუციის 100 წლის იუბილეს ულოცავს
"1921 წლის კონსტიტუცია იყო მნიშვნელოვანი მიღწევა, რომელიც სათუთად ინახავდა საამაყო სამართლებრივ ტრადიციას პროგრესული და თანამედროვე ქართული სახელმწიფოს სასარგებლოდ. უპირველეს ყოვლისა, იგი ქართველი ხალხის ძლიერ დემოკრატიულ მისწრაფებებს ასახავდა.
საქართველოს პირველმა კონსტიტუციამ ქვეყანა ევროპულ ღირებულებათა ფართო ოჯახში მტკიცედ განათავსა, იგი ყველაზე მაღლა აყენებდა დემოკრატიული მმართველობის პრინციპებს, ადამიანის უფლებების პატივისცემას, კანონის უზენაესობისა და ძირითადი თავისუფლებების დაცვას, რაც ასევე შეკრების თავისუფლებას, სიტყვის თავისუფლებასა და ბეჭდურ მედიას მოიცავდა.
მრავალი თვალსაზრისით, ეს კონსტიტუცია თავის დროს უსწრებდა. მან დანერგა არჩევნების პროპორციული სისტემის პირობებში საყოველთაო საარჩევნო უფლება, რომლითაც ქალები და მამაკაცები თანაბრად სარგებლობდნენ. ამ კონსტიტუციამ გააუქმა სიკვდილით დასჯა და ითვალისწინებდა პოლიტიკური თავშესაფრის უზრუნველყოფას და ეროვნული უმცირესობების დაცვას. მან სოციალურ-ეკონომიკური უფლებები და მართლმსაჯულების აღსრულების მკაცრი ჩარჩოებიც კი განამტკიცა. პროგრესული დემოკრატიისადმი ამ ერთგულებამ თანამედროვე ქართული სახელმწიფოსთვის მნიშვნელოვანი ორიენტირები შექმნა - ორიენტირები, რომლებიც დღემდე მეტად აქტუალურია", - ნათქვამია განცხადებაში.
საქართველოს კონსტიტუციის 100 წლის იუბილესთან დაკავშირებით განცხადება გაავრცელა ამერიკის შეერთებული შტატების საელჩომაც და საქართველოს დემოკრატიული ღირებულებების ერთგულებისკენ მოუწოდა. საქართველოს პარლამენტში კი საზეიმო ღონისძიება გაიმართა, სადაც პრემიერმინისტრობის კანდიდატმა ირაკლი ღარიბაშვილმა ოპოზიცია ბოლშევიკებს შეადარა, პრეზიდენტმა სალომე ზურაბიშვილმა კი თქვა, რომ საქართველოს წარსულშიც ბევრი დრო დაუკარგავს და ახლაც კარგავს პოლარიზაციასა და დაპირისპირებაში.