Կարեն Բեքարյանի խափանման միջոցի վերաբերյալ քննությունն ավարտվել է. դատարանը հեռացել է խորհրդակցական սենյակ․ փաստաբան
Երևանի ընդհանուր իրավասության դատարանում քիչ առաջ ավարտվել է «Քառյակ մեդիա» ընկերության համահիմնադիր, քաղաքագետ Կարեն Բեքարյանի ձերբակալության որոշման դեմ պաշտպանի բողոքի, նաև նրա նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդության քննարկումը։ Այս մասին Tert.am-ի հետ զրույցում ասաց նրա փաստաբան Գոռ Միքայելյանը:
«Դատարանը հեռացել է խորհրդակցական սենյակ և որոշումը կհրապարակվի վաղը՝ 11։30-ին»,- ասաց փաստաբանը։
Հիշեցնենք, որ Ազգային անվտանգության ծառայությունը ձերբակալել էր Ազգային ժողովի աշխատակազմի նախկին ղեկավար Արա Սաղաթելյանին, «Քառյակ մեդիա»-ի համահիմնադիր Կարեն Բեքարյանին և «Պառլամենտարիզմի զարգացման միջազգային կենտրոն» հասարակական կազմակերպության գրասենյակի մենեջեր Մհեր Ավագյանին և քաղաքացի Արամ Սարգսյանին։
Նրանք ձերբակալվել են Քրեական օրենսգրքի 226.-րդ (կազմակերպված խմբի կողմից ազգային, ռասայական կամ կրոնական թշնամանք հարուցելը), 226.2 -րդ (կազմակերպված խմբի կողմից բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը), 307.4 - րդ հոդվածների (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը) հատկանիշներով:
Արամ Սարգսյանն այսօր դատարանի որոշմամբ կալանավորվել է, Մհեր Ավագյանն ազատ է արձակվել։