Ақтөбеде "наразылыққа барғаны үшін" кәсіпорын басшысы қызметінен қуылды
- Қаланы үздіксіз сумен, жылумен қамтамасыз етудің орнына ол алаңда болған. Баррикаданың арғы жағында болғаны үшін осындай шешім қабылданды, - деген Оңдасын Оразалин баспасөз мәслихаты кезінде.
Әкімнің сөзінше, келіп-кетіп жүргендерді қоса есептегенде алаңға сол күні оң мыңдай адам жиналған. Облыс халқының саны миллионға жуықтап қалғанын, наразылар халықтың бір пайызын ғана құрағанын айтқан Оңдасын Оразалин «халықтың қалған бөлігі бізді қолдайды» деп санайды.
Наразылық кезінде алаңда болған Азаттық тілшісі бюджет қаржыландыратын мекемелердің басшыларын кездестірмеді. Алаңда Ақтөбе облыстық мәслихатының бірнеше депутаты жүрді. «Баррикаданың арғы жағында болған» Асқар Қыстаубаев та Ақтөбе облыстық мәслихатының депутаты, Nur Otan партиясының мүшесі. 15 қаңтарда "Нұр Отанның" Ақтөбе филиалының өкілдері Азаттыққа Асқар Қыстаубаевты партиядан шығару мәселесі "саяси бюро кеңесі және төрағамен ақылдасып шешіледі" деп жауап берді.
Асқар Қыстаубаев демонстранттарды қолдады ма, алаңда сөз сөйлеп, ұран тастады ма ол жағы белгісіз. Азаттық Асқар Қыстаубаевқа телефон соғып, пікір сұраған еді. Ол сырқаттанып қалып, ем алып жатқанын, бірнеше күннен соң өзі хабарласатынын айтты.