Qazahistandaki narazılıqlarda 225 insan elâk oldı — Baş prokuratura
«Elâk olğan 225 insan morglarğa ketirildi. 19-ı polis hadimi ve arbiy», — dedi Şabalayev. Onıñ malümatına köre, aman-aman 150 kişi hastahanege ketirilgen soñ can berdi.
Resmiy malümatqa köre, 50 biñden çoq insan narazılıqlarda iştirak etti, eñ az 4578 kişi yaralandı.
Akimat ve Almatı ava limanınıñ binalarını zapt etken insanlarğa «terrorist» dep ayttılar.
Maliye nezareti agentligi Qazahistannıñ energetika naziriniñ sabıq muavini Jumabay Karagayev tutuldı, dep bildirdi. Elektron ticaret meydançıqlarınıñ reberleri ve «Mangistau vilâyetinde şingen cermay gazınıñ fiyatını sebepsiz arttıruv ile bağlı olğan şahıslar» da tutuldı.
Qazahistanda yanvarniñ ekisinde şingen gaz fiyatları artqanından kütleviy narazılıqlar başlandı. Bu narazılıqlar bütün memleketke tarqaldı. Qazahistan akimiyeti Almatığa çetelde azırlıq körgen «20 biñ terrorist» (soñra İç işler nazirligi şeerde narazılıq aktsiyalarında iştirak etkenlerniñ umumiy sayısı aqqında aytıla, dep qayd etti) ücüm etti, dep bildirdi. Şu sebepten Tokayev OTAT blokundan yardım istedi. Rusiye ve ittifaq arbiyleri «strategik obyektlerni» kontrol altına aldı, akimiyet narazılıqlarnı bastıruvda olarnıñ iştirakini inkâr ete.
Yanvarniñ 10-nda OTAT online sammiti vaqtında Tokayev memleketniñ soñki adise-vaqialarını «çetel terroristleri» de iştirak etken «devlet devrimi ıntıluvı» dep adlandırdı. Qazahistan İç işler nazirliginiñ malümatına köre, kütleviy qalabalıqlardan ve polisnen olğan çatışuvlardan soñ 9,9 biñ insan tutuldı, yüzlernen cinaiy dava açıldı.
Amnesty International halqara aq qorçalayıcı teşkilâtı Qazahistan akimiyetini insan aqlarınıñ bozuluvı, hususan «quvetçiler tarafından ölümge ketirgen küç qullanıluvı» haberlerini semereli ve tarafsız bir şekilde tahqiq etmesine çağırdı.