Бесими од Брисел: Владата проактивно одговора на енергетската криза  

На денешната средба на министерот за финансии Фатмир Бесими со комесарот за економија на ЕУ, Паоло Џентилони во Брисел станало збор за енергетската криза и инфлацијата, мерките што се преземаат од страна на Владата и постоењето можности за поддршка во реализација на овие мерки од страна на ЕК.


„Како и за време на пандемијата, кога создадовме и имплементиравме пакети мерки за поддршка на здравството, економијата и ранливите категории, а кои овозможија падот на БДП да биде помал за 4,2 отсто во 2020 година, проактивни сме и во однос на енергетската криза“, рече министерот за финансии на средбата.


Тој ги напомена мерките што ги презема Владата за справување со енергетската криза и средствата што се обезбедени.


„Нашите среднорочни приоритети ќе бидат насочени кон справување со последиците од здравствената и енергетската криза, преку зголемување на инвестициите преку директна поддршка на инвестициските активности на компаниите, промоција и олеснување на инвестициската клима, отворање нови работни места преку активни мерки за вработување, како и поддршка и развој на микро, мали и средни претпријатија. Тоа значи дека ваквата поддршка ќе се реализира со формирање фондови за развој, фондови за поддршка на иновациите, гарантни фондови, фондови за ризичен капитал и слични инструменти за поддршка на извозно ориентирани компании, мали и средни претпријатија, како и социјални претпријатија“, посочи министерот.



Министерот за финансии Бесими во работна посета на Брисел


Бесими во рамки на работната посета ќе оствари средба со комесарот за соседство и преговори за проширување Оливер Вархеји, вршителот на должност генерален директор на Директоратот за соседство и преговори за проширување Мачиеј Поповски и комесарот за буџет и администрација Јоханес Хан.