Орусиянын Коопсуздук кеңеши Донбассты мамлекет катары таануу маселесин карады
Жыйынды Путин өзү ачып, аталган аймактарда окуянын башталышына баа берди. Ал “Минск макулдашуусунун алкагында Донбасстагы кырдаал боюнча сүйлөшүү мындан ары уланарынан үмүт жок” деп айтты.
Президенттик администрациянын жетекчисинин орун басары Дмитрий Козак “Киев Минск келишимин сактабай, Донбассты кайра кайтарууга аракет кылып жатканын” айтса, Федералдык коопсуздук кызматынын (ФСБ) башчысы Александр Бортников эки республиканын аймагында кырдаал начарлап баратканын, атышуулар күчөгөнүн, ал тургай Орусиянын аймагына да ок атуулар болгонун билдирди. Ал ушул тапка чейин орус жергесине 68 миңдей адам качып өткөнүн айтты.
Коопсуздук кеңешинин төрагасынын орун басары Дмитрий Медведев “бул аймактар Украинага кереги жоктугун” айтып, алардын көз карандысыздыгын таануу керек деген позициясын билдирди. Ал өзү президент болуп турган учурда Абхазия менен Түштүк Осетиянын көз карандысыздыгын тааныганын, муну менен ал жердеги адамдардын өлүмүн алдын алганын белгиледи.
Мамлекеттин думанын төрагасы Вячеслав Володин Украинанын чыгышындагы жикчилдер көзөмөлдөгөн аймактардын көз карандысыздыгын парламент тааныганын, аны президенттин бекитүүсү гана калганын билдирди. Аталган эки аймакты таануу демилгесин премьер-министр Михаил Мишустин менен Федерациялык кеңештин төрайымы Валентина Матвиенко да колдой турганын маалымдашты. Путин жакын арада чечим кабыл аларын айтып, жыйынды жапты.
Коопсуздук кеңешинин отурумун орусиялык телеканалдар түз алып көрсөтүп жатканын кабарлашты. Бир катар басылмалар жыйынга катышып жаткандардын сааттарына карап, жыйын алдын ала жаздырылганын жана бардык жактан бирдей убакытта эфирге коё берилгенин жазып жатышат.
Мунун алдында Орусия колдогон жикчил топтордун башчылары Денис Пушилин менен Леонид Пасечник Путинге кайрылып, алардын көз карандысыздыгын таанууну суранышкан. Бул Донбасстагы соңку кырдаал курчуган учурга туш келди. Өз кезегинде Орусия Украинанын тегерегине 150 миңдей аскерин жыйнаган.
Украинанын чыгышындагы согуштук аракеттерден кийин ошол аймактагы орусиячыл жикчилдер 2014-жылдын апрель айында эки облустун аталышын “Донецк Элдик Республикасы” жана “Луганск Элдик Республикасы” деп жарыялашкан. Москва Украинага карата агрессияны жана жикчилдерди колдогонун төгүндөп келет. Эки аймакты тең бир да өлкө мамлекет катары тааныган эмес, алар экөө биригип Донбасс деп да аталат. (ErN)