Орусия Украинадан аткылоо болгонун кабарлады, Киев четке какты
Мекеменин Коомчулук менен байланышуу борборунун маалыматында, объекти орус-украин чек ара сызыгынан 150 метрдей аралыкта жайгашкан. Окуядан жабыркагандар жок. ФСБ ок атуу болгон жердин видеосун да жарыялады.
Окуя саат канчада, кайсы жерде болгону так айтылган эмес. ФСБнын маалыматы экинчи булактардан ырасталган жок. Украин тарап орус чек ара бөлүктөрүн аткылоо болгонун төгүндөдү.
Орус бийлиги мурдараак да украин тараптан атылган октор Орусиянын аймагына түшкөнүн кабарлаган. Украинанын президенти Владимир Зеленский бул маалыматтарды “жалган жана чагым” деп атаган.
Украинанын чыгышындагы Донбасс аймагында кырдаал курчуп турат. Орусия колдоого алган жикчилдер менен Украинанын бийлиги ок атууларга бири-бирин айыптап жатат. Өздөрүн “Донецк Элдик Республикасы” жана “Луганск Элдик Республикасы” деп жарыялап алган аймак жарандарын Орусия тарапка эвакуациялап, жалпы элдик мобилизация жарыялаган.
Батыш өлкөлөрү Донбасстагы жаңжалды чагым катары пайдалануу менен Орусия Украинага басып кириши мүмкүн деп кооптонуп турушат. Орусия тескерисинче украин тарап аталган аймакта чагым даярдап жатат деп Киевди айыптоодо.
Учурда Украинанын чек арасында Орусиянын 150 миңдей аскерлери жыйналып турат. Москва мындан сырткары Беларуста 20-февралда аяктамак болгон аскердик машыгууну да улантууну чечти. Бул жагдай Батыш өлкөлөрүн чочутууда. Кремл Украинанын НАТОго кирүүсүнө каршы чыгып жатат, Киев жана Батыш Украина эркин өлкө экенин, ал каалаган уюмга кирүүгө укугу бар экенин билдирип келет. (ErN)