Ցավալի է, որ 2-րդ տարին անընդմեջ բաց եմ թողնում «Ուիմբլդոնը». Կարեն Խաչանով
Ռուսաստանը ներկայացնող հայ թենիսիստ Կարեն Խաչանովը անդրադարձել է «Մեծ սաղավարտի» տարվա երրորդ մրցաշար «Ուիմբլդոնը» բաց թողնելու որոշմանը:
«Ընդհանուր առմամբ, սա ինձ համար յուրահատուկ մրցաշար է, քանի որ կայուն եմ ելույթ ունենում: Միշտ, երբ ժամանել եմ Ուիմբլդոն, յուրահատուկ թենիսային մթնոլորտ եմ զգացել:
Բոլոր թենիսիստները սպիտակ համազգեստով են, սերուցքային ելակ է տրամադրվում, իսկ կենտրոնական կորտի մթնոլորտը շատ ոգեշնչող է: Այնպես որ, ցավալի է, որ երկրորդ տարին անընդմեջ բաց եմ թողնում այս մրցաշարը:
Այնուամենայնիվ կրկնեմ, որ այս անհաջողությունը կօգտագործեմ որպես մոտիվացիա՝ վերադառնալու համար»,- Խաչանովի խոսքը մեջբերում է «Известия»-ն:
Հիշեցնենք, որ աշխարհի 11-րդ ռակետը «Մեծ սաղավարտի» տարվա երկրորդ մրցաշար «Ռոլան Գարոսում» ստացել էր ծնկի վնասվածք, ինչի պատճառով բաց էր թողել նաև գերմանական Հալեում կայացած ATP-500 շարքի մրցաշարը:
«Ուիմբլդոնը» կանցկացվի հուլիսի 3-16-ը: Այդ մրցաշարում Կարեն Խաչանովը լավագույն արդյունքը գրանցել էր 2021-ին՝ դուրս գալով քառորդ եզրափակիչ։
The post Ցավալի է, որ 2-րդ տարին անընդմեջ բաց եմ թողնում «Ուիմբլդոնը». Կարեն Խաչանով appeared first on ԳԱԼԱ.