უკრაინაში ჩავიდა სამხრეთ კორეის პრეზიდენტი

სამხრეთ კორეის პრეზიდენტი, იუნ სოკ ელი წინასწარ გამოუცხადებელ ვიზიტად ჩავიდა უკრაინაში, სადაც მან პრეზიდენტ ვოლოდიმირ ზელენსკისთან შეხვედრამდე მოინახულა კიევის მახლობლად მდებარე ქალაქები ბუჩა და ირპენი. კორეის პრეზიდენტის ოფისის ცნობით, „თავდაპირველად პრეზიდენტი ჩავიდა მასობრივი მკვლელობის ქალაქ ბუჩაში, რომელიც კიევის მახლობლად მდებარეობს და ქალაქ ირპენში, სადაც სარაკეტო დარტყმები მიაყენეს საცხოვრებელ რაიონებს“.


სამხრეთმა კორეამ, რომელიც მსოფლიოში მეათე ადგილზეა იარაღის ექსპორტის მხრივ, ჰუმანიტარული დახმარება გაუგზავნა უკრაინას და ტანკები და ჰაუბიცები მიჰყიდა პოლონეთს, რომელიც უკრაინის საკვანძო მოკავშირეა რუსეთთან ომში.


ახლახან გავრცელდა ცნობა, რომ სეული კიევს განაღმვის აღჭურვილობას მიაწვდის. სამხრეთი კორეა, ამასთან, ნატოს ფონდის მონაწილეა, რომელიც უკრაინას უწევს მხარდაჭერას.


გაზაფხულზე სეულმა განაცხადა, რომ შეუძლია უკრაინას მიაწოდოს იარაღი, თუ მშვიდობიან მოსახლეობას სერიოზული საფრთხე შეექმნება.


მოსკოვმა გამოაცხადა, რომ რუსეთი გაითვალისწინებს უკრაინისთვის იარაღის მიწოდებას, როცა საქმე შეეხება კორეის ნახევარკუნძულზე ვითარების მოგვარებას.