4-տառանոց բառի մեջ 7 սխալ է անում․ ով է ՏԿԵ նախարարի տեղակալը․ «Ժողովուրդ»
«Ժողովուրդ» օրաթերթը գրում է․ «ՀՀ տարածքային կառավարման եւ ենթակառուցվածքների նախարարի տեղակալ Նարեկ Մանուկյանը, որը պատասխանատու է սուբվենցիոն ծրագրերի իրականացման համար, փաստորեն, նախարարության ոչ այնքան հաճելի աշխատակիցներից է: Բանն այն է, որ Նարեկ Մանուկյանը մինչ նախարարի տեղակալ դառնալը ժամանակին եղել է Գեղարքունիքի մարզպետ, ներկայիս ՏԿԵ նախարար Գնել Սանոսյանի տեղակալը: Նարեկ Մանուկյանի կենսագրականում նշված է, որ նա 01.10.2014թ․-15.01.2016 թ. եղել է «Վիվառո Գեյմ» ՍՊԸ-ի մենեջեր, մինդեռ մեր աղբյուրները մեզ ասում են, որ նա եղել է մատուցող, եւ կենսագրական տվյալները ուռճացված են:
«Ժողովուրդ» օրաթերթը կապ հաստատեց փոխնախարար Մանուկյանի հետ՝ ճշտելու, թե արդյոք ճիշտ են վերոնշյալ թեզերը։ «Սուտ են»-, հանգիստ ու անտարբեր տոնով նշեց փոխնախարարը: Թե կենսագրական տվյալների որ տողերն են համապատասխանում իրականությանը, եւ որը՝ ոչ, դա հարցի մի կողմն է, մյուսն ավելի խնդրահարույց է:
Բանն այն է, որ, իբրեւ թե, Հայաստանի պոլիտեխնիկական համալսարանն ավարտած Մանուկյանը սկզբում փոխմարզպետ էր, հիմա՝ փոխնախարար. հետաքրքիր է՝ Սանոսյանը նրան ուր է տանելու, երբ ազատվի նախարարի իր պաշտոնից, կամ ինչու է այդքան կարգ ու կանոն սիրող, օրենքով աշխատող ՏԿԵ նախարարը իր հետ ման տալիս Նարեկ Մանուկյանին, երբ, ինչպես գործընկերներից շատերն են նշում, «4-տառանոց բառի մեջ 7 սխալ է անում»»:
Ամբողջական հոդվածը՝ թերթի այսօրվա համարում