ირაკლი ღარიბაშვილი ჯეიკ სალივანს შეხვდა
საქართველოს მთავრობის ადმინისტრაციის პრესსამსახურის მიერ გავრცელებული ინფორმაციით, „მხარეებმა ორმხრივი ურთიერთობების საკითხების ფართო სპექტრი მიმოიხილეს და სტრატეგიული პარტნიორობის განმტკიცების მიმართულებით გადასადგმელ ნაბიჯებზე იმსჯელეს“.
საუბარი შეეხო რეგიონული უსაფრთხოების საკითხებს. „ირაკლი ღარიბაშვილმა ხაზი გაუსვა გლობალური გამოწვევების ფონზე ერთიანი ძალისხმევის მნიშვნელობას“.
შეხვედრაზე განიხილეს საქართველოს ევროინტეგრაციის პროცესიც და საქართველოში აშშ-ის ახალი ელჩის დროულად ჩამოსვლის მნიშვნელობა.
„ირაკლი ღარიბაშვილმა ხაზგასმით აღნიშნა, რომ ქვეყნის ევროინტეგრაცია საქართველოს მთავრობის საგარეო პოლიტიკის უმნიშვნელოვანესი პრიორიტეტია და მმართველი გუნდი ყველაფერს აკეთებს დასახული მიზნის მისაღწევად. პრემიერ-მინისტრმა აღნიშნა, რომ მიესალმება ახალ ელჩად რობინ დანიგენის დანიშვნას, რომელთანაც საქართველოს მთავრობა ორმხრივი ურთიერთობების გაღრმავებისა და გაძლიერების მიზნით აქტიურ და მჭიდრო თანამშრომლობას გეგმავს".
ირაკლი ღარიბაშვილი ჯეიკ სალივანთან შეხვედრას სოციალურ ქსელ X-შიც (ყოფილი ტვიტერი ) გამოეხმაურა.
„მოხარული ვარ, რომ შევხვდი ეროვნული უსაფრთხოების მრჩეველს, ჯერ სალივანს. განვიხილეთ ჩვენი სტრატეგიული პარტნიორობა და ჩავუღრმავდით მის მნიშვნელობას რეგიონული და გლობალური გამოწვევების გადაჭრის საქმეში“, - წერს ირაკლი ღარიბაშვილი.
საქართველოს პრემიერ-მინისტრი ირაკლი ღარიბაშვილი აშშ-ში ვიზიტის ფარგლებში ასევე შეხვდა ესტონეთის პრეზიდენტს, ალარ კარისსა და ჩეხეთის პრეზიდენტს, პეტრ პაველს. მხარეებმა არსებული თანამშრომლობის შემდგომი გაძლიერების პერსპექტივებზე იმსჯელეს, საუბარი შეეხო საქართველოს ევროინტეგრაციის მისწრაფებებს, 12 რეკომენდაციის შესრულების საკითხსა და საქართველოსთვის ესტონეთისა და ჩეხეთის მხარდაჭერის მნიშვნელობას.
საქართველოს პრემიერ-მინისტრი ირაკლი ღარიბაშვილი ნიუ-იორკში შეხვედრებს მართავს გაეროს გენერალური ასამბლეის 78-ე სესიის ფარგლებში.