Павлодар облысының бұрынғы әкімі жаңа қызметке тағайындалды
Әбілқайыр Сқақов ӘМСҚ басқарма төрағасының міндетін атқарушы болып тағайындалды, - деп хабарлайды Tengrinews.kz тілшісі қор мәліметіне сілтеме жасап.
Әлеуметтік медициналық сақтандыру қорының ұжымына жаңа басшыны ҚР Денсаулық сақтау бірінші вице-министрі Тимур Сұлтанғазиев таныстырды.
"Әбілқайыр Бақтыбайұлының мемлекеттік қызметте 28 жылдан астам тәжірибесі бар, оның 18 жылын бірінші басшы ретінде қызмет атқарған. Қаржы министрлігінің жүйесінде 19 жыл жұмыс істеді. Соның ішінде Салық комитеті төрағасының орынбасары және Қаржы мониторингі комитетінің төрағасы қызметін атқарды", - деді бірінші вице-министр.
Әбілқайыр Сқақов 1974 жылы Павлодар облысында дүниеге келген. "Экономист және қаржыгер" (Шәкәрім атындағы Семей мемлекеттік университеті), "Заңгер" (Қазақ құқық және халықаралық қатынастар институты) және "Іскерлік әкімшілендіру магистрі" (М.Ломоносов атындағы Мәскеу мемлекеттік университеті) мамандықтары бойынша үш жоғары білімі бар.
Әбілқайыр Сқақов 1995 жылдан 2012 жылға дейін Павлодар және Қостанай облыстарының салық органдарында жұмыс істеген. 2006–2008 жылдар аралығында Павлодар облысы денсаулық сақтау департаменті директорының экономика жөніндегі орынбасары қызметін атқарған.
2012-2016 жылдары Қаржы министрлігі жүйесінде, оның ішінде Астана қаласы бойынша Мемлекеттік кірістер департаментін басқарды. 2016-2019 жылдар аралығында Әбілқайыр Сқақов Қорғаныс министрінің орынбасары ретінде қаржы және экономика мәселелерін басқарды, одан кейін Қаржы мониторингі комитетінің төрағасы.
2020-2022 жылдары Павлодар облысының әкімі болған.
"Ерең еңбегі үшін" медалімен марапатталған және "Құрмет" орденінің иегері.
Сілтемесіз жаңалық оқисыз ба? Онда Telegram желісінде парақшамызға тіркеліңіз!