Трампга нисбатан нафрат руҳий касаллик сифатида тан олиниши мумкин
Қонун лойиҳаси республикачи сенаторлар томонидан Миннесота Сенатининг Соғлиқни сақлаш ва аҳолига хизмат кўрсатиш қўмитаси муҳокамасига 17 март куни киритилиши режалаштирилган.
Республикачиларга кўра, Трампга муросасизлик синдромининг асосий белгилари қаторига "Трамп сабаб юзага келган умумий истерика", оғзаки нафрат ифодалари ҳамда Трамп тарафдорларига нисбатан тажовузкор ва зўравонлик ҳаракатлари киради. Уларнинг фикрига кўра, ушбу синдром сабабли кўплаб одамлар Трампнинг сиёсий қарорларини руҳий касаллик аломатлари сифатида талқин қилишади.
Аммо ушбу ташаббус соғлиқни сақлаш соҳасидаги экспертлар ва фуқаролик жамияти вакиллари томонидан жиддий хавотир билан қарши олинмоқда. Улар руҳий саломатлик диагностикасининг сиёсийлашуви инсонларнинг сиёсий фикрини билдириш эркинлигини чеклаш воситасига айланиб қолишидан хавфсирамоқда. Шунингдек, бу ташаббус бошқа ҳақиқий руҳий касалликларга бўлган эътиборнинг камайишига олиб келиши мумкин, деган хавотирлар мавжуд.
Аввалроқ, Оқ уй матбуот котиби Каролин Левитт ва коммуникация директори Стивен Чеунг кўплаб Трамп танқидчиларини ушбу синдром билан айблаган эди, аммо уни расмий ташхис сифатида қабул қилишга ҳаракат қилинмаган эди.
Қонун лойиҳасининг муҳокамаси нафақат Миннесота, балки бутун мамлакат миқёсида кенг баҳсларга сабаб бўлиши кутилаётган бир пайтда, мутахассислар мазкур ташаббуснинг руҳий саломатлик соҳасига салбий таъсир кўрсатишидан хавотир билдирмоқда.