აზერბაიჯანმა 1 ივლისამდე გადაავადა სახმელეთო საზღვრის გახსნა
აზერბაიჯანის ტერიტორიაზე განსაკუთრებული საკარანტინო რეჟიმი გახანგრძლივდა, ამჯერად - 1 ივლისამდე. როგორც სააგენტო Trend-ი იუწყება, შესაბამისი განკარგულება პრემიერ-მინისტრმა ალი ასადოვმა გამოსცა.
ქვეყნის სახმელეთო საზღვრები 2020 წლის გაზაფხულიდანაა ჩაკეტილი. ბაქოში აცხადებდნენ, რომ კორონავირუსის პანდემიისას დაწესებულ საკარანტინე რეჟიმს შეინარჩუნებდნენ „მანამ, სანამ ამის აუცილებლობა იარსებს“. პრეზიდენტი ილჰამ ალიევი ამბობდა, რომ ჩაკეტილმა საზღვრებმა ქვეყანა გადაარჩინა „ძალიან დიდი კატასტროფისგან“.
ამჟამად აზერბაიჯანში შესვლა მხოლოდ საჰაერო სატრანსპორტო გზითაა შესაძლებელი. ამასთან, უცხოელებსა და მოქალაქეობის არმქონე პირებს აზერბაიჯანის დატოვება შეუძლიათ სახმელეთო საზღვრითაც.
მანამდე ცნობილი გახდა, რომ საქართველოსა და აზერბაიჯანს შორის 1 მაისიდან შესაძლოა, სარკინიგზო მიმოსვლა აღდგენილიყო. აზერბაიჯანის სახმელეთო გზის გახსნის აუცილებლობის შესახებ არაერთხელ განაცხადეს საქართველოში მცხოვრებმა ეთნიკურად აზერბაიჯანელებმა და მეხუთე პრეზიდენტმა სალომე ზურაბიშვილმა.
კორონავირუსის გავრცელების პრევენციის საბაბით 2020 წელს დაკეტილი სახმელეთო საზღვარი, აზერბაიჯანს დღემდე არცერთ მეზობელთან არ გაუხსნია.
ჯანდაცვის მსოფლიო ორგანიზაციამ 2023 წლის მაისში კორონავირუსის პანდემია დასრულებულად გამოაცხადა.