რუსეთის არმიამ მასირებული თავდასხმა მოაწყო ოდესაზე

რუსეთის არმიამ მასირებული თავდასხმა მოაწყო ოდესაზე დრონებით 20 მარტის გვიან საღამოს, იტყობინება ადგილობრივი ხელისუფლება.

მერი გენადი ტრუხანოვი წერს, რომ აფეთქებები ისმოდა ქალაქის სამხრეთ რაიონებში. "პუბლიკის" კორესპონდენტები იტყობინებიან, რომ ოდესაში 15-ზე მეტი აფეთქების ხმა გაისმა, წერს "უკრაინსკაია პრავდა". გამოცემას ასევე მოჰყავს უკრაინის პრეზიდენტის აპარატის უფროსის, ანდრი ერმაკის ინფორმაცია. მისი თქმით, რუსეთმა კვლავ შეუტია სამოქალაქო ინფრასტრუქტურას. ერმაკმა აღნიშნა, რომ არიან დაშავებულები. მათი რაოდენობა ზუსტდება.

ASTRA Telegram-ის არხი ადგილობრივი მედიის ინფორმაციაზე დაყრდნობით იუწყება, რომ ქალაქში დაზიანდა საცხოვრებელი კორპუსი, სავაჭრო ცენტრი, მაღაზია და საწარმოები.

მანამდე, 20 მარტს, ორი ადამიანი დაიღუპა უკრაინის სუმის რაიონის სოფელ კრასნოპოლიეზე რუსეთის ავიაციის იერიშის შედეგად, იტყობინება რეგიონული პროკურატურა. დეპარტამენტის ცნობით, შუადღისას კრასნოპოლიეზე მართვადი საჰაერო ბომბები ჩამოაგდეს. ერთი ბომბი საცხოვრებელ შენობას მოხვდა. დაიღუპნენ 69 წლის ქალი და 51 წლის მამაკაცი. პროკურატურაში განაცხადეს, რომ მიმდინარეობს წინასწარი გამოძიება.
რუს სამხედროებს კომენტარი არ გაუკეთებიათ ოდესაზე დარტყმის შესახებ. მოსკოვი ომის განმავლობაში ყოველთვის უარყოფს ბრალდებებს უკრაინაში სამოქალაქო ობიექტებზე მიზანმიმართულ თავდასხმებზე.