Mart türkmen studentleri üçin mejbury çäreleriň aýyna öwrüldi
Türkmenistanda mart aýy mejbury çäreleriň köplemegi bilen tapawutlandy. Ýokary okuw jaýlarynda bilim alýan ýaşlar bag ekişlik işlerine we at çapyşygyna tomaşaçy bolmaga yzygiderli mejbur edilýär.
Azatlygyň habarçylaryna görä, çäreleriň sany bahar pasly başlanaly bäri gitdigiçe köpelipdir.
Paýtagtda studentler her dynç günleri guramaçylykly görnüşde ippodroma alnyp barylýar we at çapyşyklara tomaşa etmäge mejbur edilýär.
"Şenbe we we ýekşenbe günleri studentler dyn almagyň we özlerine zerur işleri etmegiň, ýuwnup-ardynmagyň ýerine ir säherden umumy ýaşaýyň jaýlaryndan awtobuslara mündürilip, ýazky möwsümiň at çapyşygyna ippodromlara mejbury tomaşaçy hökmünde alnyp gidilýärler" diýip, paýtagtly çeşme aýdýar.
Bu ýagdaýdan habarly çeşmeleriň sözlerine görä, bu tertip ýaz pasly gutarýança dowam etdiriler.
Azatlyk bilen anonimlik şertinde gürleşen çeşmeler, şol sanda studentler öz dynç alyş günlerinden mahrum edilmegine nägile bolýarlar, üstesine at çapyşygy bilen düýpden gyzyklanmaýandygyny aýdýarlar.
"At çapyşygyndaky tomaşaçylaryň aglabasy at çapyşygyna we atlara gyzyklanmasy we höwesi bolmadyk ýaş ýigit we gyz talyplardan ybarat" diýip, çeşme belleýär.
Ýokary okuw jaýlarynyň studentleri bag ekişlik bilen bagly çärelere hem gatnaşdyrylýarlar.
22-nji martda Türkmenistanyň ähli künjeklerinde geçiriljek ählihalk bag ekişlik çärelerine studentleriň hökman gatnaşmalydygy olara öňünden duýduryldy diýip, ýene bir çeşme şeýle diýdi: "Kimde kim prezidentiň ýolbaşçylygynda bag ekmek çäresine gatnaşmakdan boýun gaçyran ýagdaýynda, studentiň okuwyna ýetişýändigine garamazdan, onuň okuwdan kowuljaklygy barada aýdylyp, haýbat atylýar".
Studentleriň sözlerine görä, olar öz mugallymlaryna yssy howada, suwarylman ekilýän baglaryň guraýandygy, edilen azabyň puç bolýandygy barada aýtsalar, mugallymlar nahallaryň "göz üçin ekilýändigini" aç-açan boýun alýarlar.
Türkmenistanda bag ekişlik ýylda iki gezek bahar we ýaz möwsüminde geçirilýär. Türkmen mediasy ýylda millionlarça düýp täze agajyň oturdylýandygyny ýyllar boýy habar berip gelýär, emma öň ekilen agaçlaryň ýagdaýyny agzamaýar.
Dabaraly ýagdaýda resmileriň we ilatyň gatnaşmagynda geçirilýän bag ekmek çäreleri döwlet telewideniýesinde görkezilýär.
Telewideniýede görkezilýän reportažlaryň käbiri öňünden sahnalaşdyrylyp taýýarlanýar. Hususan-da, Mary welaýatynda bag ekmek boýunça çäreler okuw jaýlarynda we edara-kärhanalarynda 1-nji fewralda geçirilipdir.
Ekiljek agaçlar üçin şu aýda ilatdan pul toplandy. Ýurduň býujet edaralarynyň işgärleri we okuw jaýlarynda bilim alýan studentler we okuwçylar pul tabşyrmaga mejbur boldy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.