Япон олимлари туғма карликни даволаш усулини топди
GJB2 гени ва унинг аҳамияти
GJB2 гени ички қулоқдаги ҳужайраларга товуш сигналларини узатишда муҳим ўрин тутади. У организмда товуш сигналларини қабул қилиш ва ишлов бериш жараёнида иштирок этувчи махсус оқсилларни ишлаб чиқариш учун жавобгардир. Бироқ, ушбу гендаги айрим мутациялар бу жараённи бузиб, одамнинг туғма кар бўлишига сабаб бўлади.
Янги ген терапияси усули
Олимлар бу муаммони ген таҳрирлаш технологияси ёрдамида ҳал қилиш усулини топди. Улар тўғри ишлайдиган GJB2 генини хавфсиз вирус орқали қулоқ ҳужайраларига юбориш йўли билан муаммони ҳал қилиш мумкинлигини аниқлади.
Генларни таҳрирлаш учун қўлланиладиган одатий усуллар катта ҳажмли маълумотларни узатишга мўлжаллангани сабабли, олимлар ушбу жараён учун ихчам ва аниқ версиясини ишлаб чиқди.
Лаборатория синовлари ва натижалар
Янги усул инсон ҳужайралари ва лаборатория сичқонлари устида синовдан ўтказилди. Натижада, ген терапияси қулоқ ҳужайраларининг соғлом организмдаги каби ишлашини тиклади. Бу туғма эшитиш қобилияти йўқ одамларни самарали даволаш имконини яратади.
Тадқиқот раҳбари доктор Казусаку Камиянинг таъкидлашича, ушбу терапия нафақат карликни даволаш, балки бошқа генетик касалликларни ҳам бартараф этишда ёрдам бериши мумкин.
Келажакда миллионлаб одамлар учун умид
Япон олимларининг мазкур ютуғи келажакда миллионлаб одамларга эшитиш қобилиятини тиклаш имконини беради. Илмий ишланма инсон генидаги мутацияларни бартараф этишга қаратилган бўлиб, тиббиёт соҳасида янги имкониятлар эшигини очиши мумкин.
Ген терапияси инсон саломатлиги соҳасидаги энг истиқболли йўналишлардан бири бўлиб, унинг кенг қўлланилиши келажакда генетик хасталикларни бартараф этишга ёрдам беради.