TBC Ўзбекистонда янги бошқарувчи компания тузади
TBC Bank Group PLC Европа тикланиш ва тараққиёт банки (ЕБРР) ҳамда Халқаро молия корпорацияси (МФК) билан келишувга эришди. Келишувга кўра, Ўзбекистондаги бизнеслар ягона бошқарув остида — TBC Digital номли янги компания таркибида бирлаштирилади. Янги компания республикада рўйхатдан ўтказилган бўлиб, TBC Uzbekistan экотизими доирасидаги барча бизнесларини бошқаради. TBC Digital'нинг бош директори сифатида Ника Курдиани тайинланади.
2021 йил сентябрда ЕБРР ва МФК TBC Bank Uzbekistan’нинг 20 фоиздан акциясини харид қилган, TBC Group эса 60 фоиз улушга эга бўлган. Бошқарувни тартибга солиш мақсадида томонлар акциядорлик шартномаси тузган, унда директорлар кенгаши ва акциядорлар ваколатлари белгилаб қўйилган. Ҳар икки молиявий институт ўз улушларини TBC Bank'га сотиш ва TBC Bank уни қайта сотиб олиш ҳуқуқини берувчи опционга эга бўлган.
Янги келишувларга кўра, TBC Digital TBC Bank Uzbekistan ва Payme’нинг ягона эгасига айланади. Компаниядаги улушлар қуйидагича тақсимланади:
TBC PLC — 79,7%
ЕБРР — 10,15%
МФК — 10,15%
Аввалги бошқарув тузилмаси бекор қилинади ва унинг ўрнига янги структура яратилади. Шунингдек, янги акциядорлик ва опцион шартномалари ҳам имзоланади.
Шартларга кўра, ЕБРР ва МФК беш йилдан кейин ўз улушларини TBC PLC’га сотиши мумкин. Агар акциялар чиқаришнинг иложи бўлмаса, тўлов нақд пулда амалга оширилади. Саккиз йилдан кейин эса TBC PLC ўз ҳиссасига тўлиқ эга бўлиш ҳуқуқини олади.
TBC Bank Group бош директори Вахтанг Буцхрикидзе таъкидлашича, янги бошқарувчи компаниянинг ташкил этилиши акциядорлар учун қийматни ошириш, бошқарув стандартларини яхшилаш ва синергия имкониятларини очишга хизмат қилади.
Янги келишувлар тўлиқ рўйхатдан ўтказилгандан сўнг, яқин уч ой ичида кучга киради.