Мирзиёев ва Токаев Алматида учрашув ўтказди
Мулоқот анъанавий дўстона ва ишчан муҳитда ўтди. Томонлар қўшничилик, стратегик шериклик ва иттифоқчилик асосидаги икки томонлама муносабатларни янада мустаҳкамлаш масалаларини муҳокама қилдилар.
Давлат раҳбарлари Наврўз ва кириб келаётган Рамазон ҳайити муносабати билан бир-бирларини ва халқларни самимий табрикладилар.
Учрашувда Ўзбекистон-Қозоғистон ҳамкорлигининг юқори даражада экани алоҳида таъкидланди. Бугунги кунда барча даражада фаол алоқалар ривожланмоқда, товар айирбошлаш ҳажми йил бошидан бери 14 фоизга ошган, 4 миллиард долларлик инвестиция лойиҳалари портфели шаклланган, ҳудудлараро алоқалар ва маданий-гуманитар ҳамкорлик кучаймоқда.
Премьер-министр ўринбосарлари икки томонлама савдони ошириш, машинасозлик, электротехника, нефть-газ, тўқимачилик, қишлоқ хўжалиги ва бошқа устувор соҳаларда қўшма лойиҳаларни илгари суриш бўйича амалга оширилаётган ишлар юзасидан ҳисобот бердилар.
Президентлар саноат кооперацияси бўйича узоқ муддатли дастурни ишлаб чиқиш, минтақавий инфратузилма лойиҳаларини тезлаштириш бўйича аниқ топшириқлар бердилар. Жорий йилда Халқаро саноат кооперация марказини амалий ишга тушириш ва қўшма ташқи савдо компанияси фаолиятини кенгайтириш муҳимлиги қайд этилди.
Мамлакат раҳбарлари минтақавий кун тартиби юзасидан, жумладан, Ўзбекистонда бўлиб ўтадиган Марказий Осиё саммитларига тайёргарликни ҳам муҳокама қилдилар. Шунингдек, икки ва кўп томонлама тадбирлар тақвими кўриб чиқилди.
Пресс-службага кўра, учрашув дўстона ва конструктив муҳитда ўтди.