Ўзбекистон терма жамоасида пенальтини ким тепиши керак?
Умуман олганда, сўнгги пайтларда Ўзбекистоннинг турли ёшдаги жамоалари орасида 11 метрлик жаримадан аниқ фойдаланиш борасида муаммо юзага келмоқда. “Дарё” таниқли шарҳловчи Мирзаҳаким Тўхтамирзаевнинг бу борадаги фикрлари билан қизиқди.
Унинг фикрича, ўша куни пенальтини Абдуқодир Ҳусанов тепиши керак эди.
"Пенальтини машғулот пайтида тепиш ва минглаб мухлислар қаршисида тепишнинг фарқи катта. Сабаби футболчи машғулотда гол урса ёки ура олмаса, ҳеч нарса ўзгармайди. Лекин ўйин пайтида унда бир марта имкон бўлади. Шу боис жарима зарбасини тепа оламанми деган руҳий босим ўз таъсирини ўтказади. Дунёдаги барча футболчи пенальти тепишда хато қилиши мумкин. Бу футболнинг бир қисми. Яқинда Роналду ҳам Дания билан ўйинда 11 метрлик жарима зарбасидан фойдалана олмади. Лекин биз португалиялик футболчининг қандай шуғулланишини яхши биламиз.
Ҳозирги пайтда чинакам ўз ишини усталари дея баҳоланаётган — Мбаппе, Винисиус ёки бошқа юлдузлар ҳам пенальтини голга айлантира олмаяпти. Менинг фикримча, ўша куни пенальтини Абдуқодир Ҳусановга бериш керак эди. Чунки у “Энергетик БГУ” сафида ўйнаб юрганида жаримадан ҳам, пенальтидан ҳам гол уришни уддалаган. Агар ўша куни Ҳусанов гол урганда, ҳақиқий байрам бўлар эди", дейди Мирзаҳаким Тўхтамирзаев.
Фото: ЎФА