د ایران او امریکا استازي د اپریل په ۱۹مه بل پړاو خبرې اترې کوي
سپینه ماڼۍ وايي، د امریکا او ایران استازو موافقه کړې چې راتلونکې شنبه به د لوړې کچې خبرو اترو دوهم پړاو ترسره کړي.
د دواړو خواوو ترمنځ د خبرو اترو لومړی پړاو پرون شنبه ( د اپریل په ۱۲مه) د عمان په پلازمېنه مسقط کې ترسره شو.
سپینې ماڼۍ د شنبې په ورځ ناوخته یوه اعلامیه خپره کړه او ویې ویل، "خبرې اترې مثبتې او رغنده وې."
په بیان کې دا هم ویل شوي چې د امریکا ځانګړي استازي سټیفن ویټیکر ټینګار وکړ چې "هغه د امریکا له ولسمشر ډونالډ ټرمپ څخه یو ماموریت ترلاسه کړی چې که امکان ولري د دواړو هیوادونو ترمنځ شخړه د خبرو اترو او ډیپلوماسۍ له لارې هواره کړي."
د امریکا او ایران د استازو له دغو خبرو څخه مخکې، ولسمشر ټرمپ خبرداری ورکړ چې که ایران له خپل اټومي پروګرامه لاس وانخلي، نو د اسراییلو په مشرۍ به له پوځي برید سره مخ شي.
متحده ایالات د ایران د یورانیمو د زیرمو په اړه مخ په زیاتیدونکې اندیښنه لري.
تهران وايي چې د اټومي وسلو د جوړولو پلان نه لري او د اټومي پروګرام اهداف یې "سوله ییز" دي.
د سپینې ماڼۍ له خبرپاڼې مخکې د ایران د بهرنیو چارو وزیر د اپریل د ۱۹مې خبرو اترو په اړه شوې موافقه اعلان کړې او وې ویل، د راتلونکې غونډې موضوع به "د تړون عمومي چوکاټ" په اړه بحث ته وقف شي.
امریکا او د نړۍ نورو قدرتونه د ۲۰۱۵ کال په جولای کې اټومي تړون ته ورسېدل، خو ټرمپ په ۲۰۱۸ کال کې له اټومي تړون څخه امریکا وایستله او دا یې "په تاریخ کې تر ټولو بده معامله" وبلله.
په ۲۰۲۱ کال کې د جو بایډن د ولسمشرۍ پر مهال، ایران او امریکا د اتریش په پلازمېنه ویانا کې د اټومي تړون د بیا ژوندي کولو په هدف غیر مستقیمې خبرې اترې وکړې، خو دا خبرې اترې او د تهران او اروپايي هېوادونو ترمنځ نورې خبرې اترې کومې موافقې ته ونه رسیدلې.