د اوکراین پر سومي ښار د روسیې په برید کې ګڼو کسانو ته مرګژوبله اوښتې ده
اوکرایني چارواکي وايي، پر سومي ښار د روسیې د توغندیو په برید کې لږ تر لږ ۳۲ تنه وژل شوي دي.د اوکراین د بیړنیو خدماتو چارو ادارې د اپرېل پر ۱۳مه د مرګژوبلې لوړېدو خبر ورکړ. تر دې مخکې ځايي چارواکو د وژل شویو شمېر ۲۱ یاد کړی وو. په وژل شویو کې دوه ماشومان هم شامل دي.
چارواکي وايي، په حمله کې د ۱۰ ماشومانو په ګډون لږ تر لږه ۸۴ تنه ژوبل شوي دي.
د سومي سیمې پوځي انتظامیې د اپرېل پر ۱۳مه وویل چې روسیو ځواکونو د هغه وړوکي ښار پر مرکز دوه بیلېسټېک توغندي ویشتلي دي.
هغه وړوکی ښار د اوکراین په شمال کې د روسیې پولې ته نېږدې پروت دی.
د اوکراین د کورنیو چارو وزیر اېهور کلېمېنکو ویلي دي چې پولیسو د پېښې ښکار شوی ځای کلابند کړی دی چې د بیړنیو خدماتو ادارې کارکوونکي په اسانۍ خپلې چارې ترسره کړای شي.
اوکرایني ولسمشر وولودیمیر زېلېنسکي برید غندلی دی. نوموړي د اپرېل پر ۱۳مه پر اېکس (پخواني ټوېټر) په بیان کې ویلي دي چې روسیو توغندیو د هغې سیمې "یو عادي کوڅه - چې رهایشي ودانۍ او تعلیمي ادارې پکې دي - او عادي ژوند په نخښه کړی دی."
مسکو لا د پېښې په اړه څه نه دي ویلي.
په داسې حال کې چې امریکا په اوکراین کې د اوربند هڅه کوي، روسیې پر هغه هېواد حملو ته زور ورکړی دی.
د اپرېل پر شپږمه روسیو ځواکونو د اوکراین پر پلازمېنې کییف بیلېسټېک توغندی وویشت او د خارکیف په ختیځ کې یې پر یو ښار بم وغورځاوه. پر کییف په برید کې د ازادۍ په نوم د یو ټېلېوېژن وداني په نخښه شوه او پکې یو کس ووژل او لږ تر لږه درې ژوبل شول.
پر هم هغه ورځ د روسیې د دفاع وزارت وویل، اوکراین په هغه هېواد کې پر اهدافو ۱۱ ډرونونه ویشتلي دي.
تر دې یوه ورځ مخکې په کرېويي رې وړوکي ښار کې د روسیو توغندیو په برید کې د ۹ ماشومانو په ګډون ۲۰ تنه ووژل شول.
مسکو دعوه کړې وه چې په هغه برید کې یې د اوکراینیو پوځیانو یوه غونډه په نخښه کړې وه.