Миржалол Қосимов ОКМК "Сўғдиёна"ни мағлуб этган ўйин ҳақида нималар деди?
Ўйин ҳақида
"Сўғдиёна"га қарши ҳар йили қизиқарли ўйинлар бўлади. Бугун икки жамоа ҳам майдонга ғалаба учун чиққани сезилиб турди. Гол ўтказиб юборганимиздан кейин ҳам ўйинга қайта олдик. Йигитлар охиригача курашишди ва бу ўз самарасини берди. Мухлисларга ёқадиган ўйин гувоҳи бўлдик. Муҳими уч очкони қўлга киритдик. Энди кейинги учрашувларга тайёргарлик кўришимиз керак", - дея фикр билдирди Миржалол Қосимов баҳс якунлангач.
- Захирадан майдонга тушган футболчилар ўйинни ўзгартириб юборди. Бош мураббий захираларни тўғри амалга оширгани ва шу орқали ғалаба қозонгани учун мақтовга арзийди, аммо танганинг иккинчи томони ҳам бор. Захирадан майдонга тушган футболчилар ғалаба келтирган бўлса, шунда бош мураббий асосий таркибни танлашда хатога йўл қўйган бўладими? Масалан, Хуршид Ғиёсовни олдинроқ майдонга тушириш тўғрироқ қарор бўлмас эдими?
- Хуршид Ғиёсов майдонга тушганида, бошқа футболчига имкон бериш керак. Ғиёсов кўп ўйиндан бери гол урмаяпти дейишган бўлар эди. Ҳаёт мана шундай. Бундай гап-сўзлар биздан олдин ҳам бўлган, ҳозир ҳам бор ва биздан кейин ҳам бўлади. Бугун бешта футболчини ўзгартирдик ва жиддий ротацияга қўл урдик. Фақатгина 11 киши билан ўйнайвериш нотўғри. Тақвим жуда ҳам зич ва икки кундан сўнг "Насаф"га қарши ўта муҳим ўйинимиз бор. Мен имкон қадар кўпроқ футболчиларга имконият беришни танлайман. Бугун натижа салбий бўлганида ҳам ўз фикримда қолган бўлар эдим. Биласизми, ташқаридан барчаси осон кўринади. Ташқарида ҳамма мутахассис. Жамоа ичига кирганда эса умуман бошқача вазият.
Захирадан ўйинга қўшилган футболчилар ҳар доим ўйинни кучайтириши керак. Мен ҳам ўз давримда бекорга 90 дақиқа ўйнамаганман. Менга ҳам бошида 3 дақиқагина имконият берилар эди. Барча футболчилар тақдим этилган имкониятдан унумли фойдаланиши керак. Футболчи асосий таркибдан жой оладими ёки ҳакам томонидан қўшиб берилган сўнгги дақиқаларда ўйинга қўшиладими фарқи йўқ.
- ОКМК кетма-кет иккинчи қийин кечаётган учрашувда ўзига керакли натижага эришмоқда. Ушбу ғалабаларнинг сири нимада? Жамоа нима эвазига бундай ўйинларда ғалаба қозона оляпти? Масалан, Европада барча "Реал"нинг "камбэк"лари ёки керакли натижани қўлга киритишига ҳайрон қолади. Ўзига керакли натижани қайд эта олишнинг асосий сабаби ҳақида гапириб ўтсангиз...
- Футболда мағлуб бўлмайдиган жамоанинг ўзи йўқ. Биз авваламбор мухлислар учун футбол ўйнаймиз. Масалан, Европада мухлислар менталитети умуман бошқача. Жамоа мағлуб бўлса ҳам, сўнгги дақиқага қадар қўллаб-қувватлайди. Жамоа ютқазган тақдирда ҳам қарсаклар остида кузатиб қўйилади. Футболда спорт принципи бор, курашиш керак бўлади. Мен шу сабабли футбол шахмат эмас деб айтиб келаман. Сабаби шахматда ақлни ишга солиш керак. Футболда эса бутун бадан ва мияни ишлатиш керак бўлади. Йигитларга раҳмат айтаман. Биз охиригача курашдик ва шу сабабли яратган бизни ғалаба билан сийлади.
- Люпчо Дориев бугун жамоангиз дарвозасини икки маротаба ишғол этди. Бир футболчи ОКМК дарвозасига иккита гол киритса, ҳимоячилар ўша футболчини яхши қўриқлай олмаганидан далолат эмасми?
- Дориев жуда малакали футболчи. Ўтган мавсумларда ҳам дарвозамизга гол киритган эди. Футбол жамоавий ўйин ва гол ўтказиб юборган вазиятимизда бир футболчини айблаш нотўғри. Биринчи голини қандай зарба орқали киритганини кўрдингиз. Европада ҳам бундай зарбани бартараф этишга қийналишади. Дориев яримта вазиятдан ҳам гол уриб кета олади. Гол ўтказиб юборган вазиятимизни бошидан кўриб чиқишимиз керак. Аслида бундан олдин хатога йўл қўйган эдик. Иккинчи голда эса майдон марказида тўпни йўқотдик.
Али Абдураҳмонов тўпни йўқотди, ваҳоланки у бемалол тўпни қабул қилиб, шеригига пас бериши ҳам мумкин эди. Биз ҳужумга ўтаётган вақтимизда ҳимоячиларимиз рақиб ҳужумчиларини қўриқлашмайди. Сабаби биз ҳужум уюштиряпмиз. Биз эса бир ноаниқ пас орқали вазиятни ўзгартириб юбордик. Дориев эса яримта имкониятдан ҳам гол ура олди. Айрим бир футболчилар Дориевнинг ўрнида ўта ноаниқ зарба беришган бўларди. Ўтказиб юборган голларимизда ҳимоячилар айбдор демайман, бошқа футболчилар ҳам вазиятни бартараф этиши мумкин эди. Бутун жамоанинг хатоси голга олиб келди.
Манба: championat.asia