Инсайдер iPhone 17 Pro дизайнини ошкор қилди: янги смартфон қандай кўринишда бўлади?
Тақдим қилинган тасвирларда кўринишича, янги iPhone 17 Pro моделининг орқа панелдаги камера объективлари чап томонга сурилган, флеш ва LiDAR сенсори эса аксинча, ўнг томонга кўчирилган. Бу ўзгариш смартфоннинг ташқи кўринишини аввалги авлодлардан фарқлантиришга хизмат қилиши кутилади.
Мажин Боо томонидан эълон қилинган фотосуратларда бир неча хил ранглар намойиш этилган: оқ, оч кўк, оч яшил, оч бинафша ва кўмирранг. Эътиборлиси, битта фотосуратда камера панели қуюқ кулрангда акс этган бўлса-да, аксарият тасвирларда унинг оқ рангда экани кўринади. Бу эса Apple’нинг iPhone 17 Pro смартфонлари учун мўлжалланган ранг танловини олдинги — iPhone 16 Pro билан бир хил сақлашини англатмоқда.
Бироз аввал бошқа бир ишончли манба ҳам Apple’нинг янги авлод смартфонлари ҳақида хабар тарқатиб, iPhone 17 модель қатори қуйидаги тўрт моделни ўз ичига олишини билдирган эди:
- iPhone 17;
- iPhone 17 Air;
- iPhone 17 Pro;
- iPhone 17 Ultra.
Бу маълумотлар қанчалик ишончли эканлиги ва янги смартфонлар ҳақиқатда қандай кўринишда бўлиши, шунингдек, Apple компанияси яратишни режалаштирган янгиликлар ҳақида аниқ маълумотларга сентябрь ойида кутилаётган расмий тақдимот вақтида эга бўлиш мумкин бўлади.
Шундай қилиб, Apple мухлислари яна бир бор катта қизиқиш билан янги авлод смартфонларининг тақдимотини интиқлик билан кутишмоқда.