Сеулда даҳшатли ёнғин: эркак ўз жонига қасд қилиш учун 21 қаватли бинога ўт қўйди
Ҳодиса натижасида бир киши ҳалок бўлган ва яна олти нафар киши турли даражадаги жароҳатлар олган. Жароҳатланганлар орасидаги тўрт киши, ёши 50 дан 80 ёшгача бўлган фуқаролар тутундан заҳарланиш ва нафас олишдаги қийинчиликлар билан касалхонага етказилган. Уларнинг икки нафари эса тутундан сақланиш учун ўз жонини хавф остига қўйиб, бинодан тўртинчи қават баландлигидан пастга сакрашга мажбур бўлган.
Полиция маълумотига кўра, ёнғинни 60 ёшли эркак атайлаб уюштирган. У пестицид сепиш учун мўлжалланган махсус пуркагичдан фойдаланиб, бинога ўт қўйган ва ўз жонига қасд қилган. Эркак ўлимидан олдин қолдирган хатда қизидан бемор бўлган онасига қарашни илтимос қилган. Шунингдек, хат ичига турмуш ўртоғининг даволаниши учун 50 минг вон (тахминан 35 АҚШ доллари) қўйилган эди.
Полиция эркакнинг жасадини тўртинчи қаватда аниқлаган ва унинг бармоқ излари ўт қўйишда ишлатилган пуркагичдаги изларга мос келганини тасдиқлаган.
Кучли ёнғинни бартараф этиш учун ёнғин ўчирувчилар 1,5 соатдан ортиқ вақт давомида ҳаракат қилишган. Ҳозирда ҳодиса бўйича тергов ишлари давом этмоқда.