Райан Бабел Абдуқодир Ҳусанов ва Дастан Сатпаев трансферлари ҳақида фикр билдирди
Ана шундай юлдузлардан бири – "Аякс" академиясининг машҳур тарбияланувчиси Райан Бабел ҳисобланади. У ўзининг профессионал футболчилик фаолиятида икки марта Нидерландия чемпиони, мамлакат кубоги ва суперкубоги соҳиби бўлган. Бабелнинг энг ёрқин даври 2007-2011 йилларда Англиянинг "Ливерпуль" клубида тўп сурган пайтига тўғри келган эди.
2024 йил ноябрь ойида 38 ёшида профессионал фаолиятини якунлаган Бабел "Ливерпуль" ва "Аякс"дан ташқари, Германиянинг "Хоффенхайм", Испаниянинг "Депортиво", Англиянинг "Фулхэм", БААнинг "Ал-Айн", Туркиянинг "Қосимпошо", "Бешиктош", "Галатасарой" ва "Эюпспор" жамоалари сафида ҳам маҳорат кўрсатган.
Райан Бабел яқинда Англия Премьер-лигасининг кучли клублари билан шартнома имзолаган икки иқтидорли футболчи — ўзбекистонлик Абдуқодир Ҳусанов ва қозоғистонлик Дастан Сатпаев ҳақида ўз фикрларини билдириб ўтди.
— Мендан кўпчилик Дастан Сатпаевнинг "Челси"га трансфери ҳақида сўрашяпти. Агар у билан гаплашиш имконияти бўлса, мен унга клуб мураббийларининг маслаҳатларини диққат билан тинглашини айтардим. Чунки шундагина у тезроқ маҳаллий муҳитга мослашиб кетиши мумкин. Тилни яхши ўзлаштириш ҳам жамоа билан боғланишда жуда муҳим роль ўйнайди.
Энг муҳими эса — ўзингга бўлган ишонч. Баъзан мухлисларнинг катта босими футболчига салбий таъсир қилиши мумкин. Шундай вазиятларда диққат-эътиборни ўз мақсадларига йўналтира олиш жуда муҳим, — дейди Райан Бабел.
Шунингдек, у ўзбекистонлик ёш футболчи Абдуқодир Ҳусановнинг "Манчестер Сити"га ўтиши ҳақида ҳам тўхталиб ўтди:
— Ҳа, бу трансфер Ўзбекистон, Қозоғистон ва умуман, футболи ривожланаётган мамлакатлар учун катта аҳамиятга эга. Ана шундай ёш иқтидорлар пайдо бўлиб турса, Европанинг етакчи клублари скаутлари бу мамлакатлар бозорига янада жиддийроқ эътибор қаратишади.
Менинг қадрдон жамоам "Аякс" бу борада жуда яхши мисол. Бу клуб ёш ва юқори салоҳиятли футболчиларни аниқлаш, уларни профессионал даражада ривожлантириб, юқори босқичларга олиб чиқишда катта тажрибага эга, — деди тажрибали футболчи.
Эслатиб ўтамиз, 2025 йилнинг 20 январь куни "Манчестер Сити" Франциянинг "Ланс" клубидан ўзбекистонлик марказий ҳимоячи Абдуқодир Ҳусановни 40 миллион евро эвазига трансфер қилган эди. Шу билан Ҳусанов Англия Премьер-лигасида ўйнаган Марказий Осиёдан чиққан биринчи футболчи сифатида ўз номини тарихга ёздирди.
Шунингдек, Лондоннинг "Челси" клуби қозоғистонлик 16 ёшли футболчи Дастан Сатпаев билан 5 йиллик шартнома имзолади. Сатпаевнинг трансфери "Челси" учун 4,3 миллион еврога тушди. Ёш иқтидор эгаси 18 ёшга тўлгунича ўз ватанидаги "Қайрат" клубида ўйнаб туради.