Ҳоланд сафга қайтди! "Манчестер Сити" мухлислари учун ажойиб янгилик
Ҳоланд яқин вақтгача жароҳатини даволаш учун алоҳида индивидуал дастур асосида шуғулланаётган эди. Аммо чоршанба куни норвегиялик футбол юлдузи умумий гуруҳ машғулотларида қатнашиб, мухлислар кўнглини хушнуд қилди.
Жамоанинг бош мураббийи Пеп Гвардиола эртага "Вулверҳемптон" клубига қарши АПЛ баҳси олдидан ўтказиладиган матбуот анжуманида Ҳоланднинг майдонга расмий ўйинларда қайтиши ҳақида аниқ маълумот бериши кутилмоқда. Айниқса, "шаҳарликлар" мухлислари бу хабарни интиқлик билан кутишмоқда.
Эслатиб ўтамиз, Эрлинг Ҳоланд Англия кубоги доирасида "Борнмут"га қарши учрашувда жароҳат олганди. Ўша баҳсдан сўнг у стадионни қўлтиқтаёқ ёрдамида тарк этган ва бу вазият жамоа мухлислари орасида хавотирларга сабаб бўлган эди.
Ҳозирда Ҳоланднинг сафга қайтиши "Манчестер Сити" учун жуда муҳим аҳамият касб этади. Норвегиялик голеадорнинг қайтиши жамоанинг ҳужум чизиғидаги муаммоларини ҳал қилиши ва Пеп Гвардиола учун қўшимча имкониятлар тақдим этиши аниқ. "Шаҳарликлар" бу мавсум ҳам АПЛ ва Чемпионлар лигасидаги амбицияларини юқори тутмоқда ва бу йўлда Ҳоланд муҳим фигура ҳисобланади.