Айтматов проспектисиндеги жашоочуларга башка аймактан жер алуу сунушталды
Бишкек шаарынын мэриясы Чыңгыз Айтматов проспектисинде президенттин администрациясынын “Ынтымак ордо” имаратына жакын жайгашкан айрым турак жайлардын ээлерине Бишкектин башка аймагынан жер берип, көчүрүү сунушун киргизди.
Шаар бийлиги үйдүн ээлерине Бишкектен азыр жашап жаткан жерине тете жер берилерин, кыймылсыз мүлкүн каттоодон өткөн атайын компаниялар баалап, базар баасында эсептелип, кенемте төлөнөрүн кошумчалады. Бирок сөз канча турак жай боюнча болуп жатканын тактаган жок.
Бишкек шаарынын мэри Айбек Жунушалиев буга чейин Чыңгыз Айтматов проспектисин кеңейтүү ишинин алкагында Киргизия конушундагы 66 үйдүн дубалынын бир бөлүгүн бузуу пландалып жатканын билдирген. Кийин алардын айрымдары буздурула баштаган.
Конуштун тургундары мэриянын аракетин мыйзамсыз деп баалап, жеке менчик укугу бузулуп жатканын билдирип чыгышкан.
Мэрия Чыңгыз Айтматов проспектиндеги автоунаа жолун кеңейтип, алты тилкелүү трасса куруп, четине велосипед тепкендер үчүн өзүнчө жол жана тротуар салып жатат.
Бишкектин түштүк бөлүгүндө, мамлекеттик резиденцияга жакын жайгашкан “Ысык-Көл” мейманканасы 2021-жылдын аягында бузулуп, анын ордуна “Ынтымак ордо” деп аталган президенттин администрациясы 2024-жылы август айында ишке берилген. Азыр мамлекет башчы жана анын аппараты ушул имаратта иштейт. (BTo)