Ерости сувлари бўйича назорат кучайтирилади: ноқонуний қудуқ бурғилаганларга чора кўрилади
Қонунни қабул қилишдан кўзланган асосий мақсад ерости сув ресурсларидан самарали фойдаланиш, уларни муҳофаза қилиш ва бу соҳадаги назоратни кучайтиришдир. Сенаторларнинг таъкидлашича, сўнгги вақтларда ерости сувларидан суғориш ва бошқа мақсадларда фойдаланиш ҳажми сезиларли даражада кўпайиб бормоқда. Шу билан бирга, рухсатномасиз қудуқларни бурғилаш ва ерости сувларидан назоратсиз, ҳисобга олмасдан фойдаланиш ҳолатлари тез-тез учрамоқда.
Қабул қилинган қонун билан амалдаги «Лицензиялаш, рухсат бериш ва хабардор қилиш тартиб-таомиллари тўғрисида»ги қонунга янги қоида киритилади. Унга кўра, эндиликда ерости сувларига қудуқни бурғилаш учун алоҳида рухсатнома бериш тартиби ўрнига, ерости сувлари учун қудуқларни бурғилаш фаолиятининг ўзига рухсатнома бериш тартиби жорий этилади.
Бу тартибга кўра, бундан буён ерости сув ресурсларидан фойдаланиш мақсадида қудуқ бурғилаш истагида бўлган тадбиркорлик субъектлари ёки жисмоний шахслар бу фаолият учун аввало тегишли давлат идораларидан рухсатнома олишлари талаб этилади.
Қонунчиликка киритилаётган яна бир муҳим ўзгариш — Солиқ кодексига тегишли бўлиб, унга мувофиқ ерости сувларидан фойдаланувчилар сув олишда махсус ҳисобга олиш ускуналаридан фойдаланмасалар, улардан солиқ тўлови белгиланган ставканинг беш баравари миқдорида ундириладиган бўлди.
Бу каби чора-тадбирларнинг жорий этилиши ерости сув ресурсларини асраш, атроф-муҳитни муҳофаза қилиш ва сув ресурсларидан ноқонуний фойдаланиш ҳолатларига чек қўйишда муҳим қадам бўлиши таъкидланмоқда. Қонун лойиҳасига муҳокамалар чоғида сенаторлар ҳамда мутахассислар ерости сув ресурсларидан оқилона ва масъулиятли фойдаланиш ҳар бир фуқаронинг бурчи эканини, бу каби ўзгаришлар мамлакатнинг сув хавфсизлигини таъминлашга хизмат қилишини алоҳида қайд этдилар.