Камала Ҳаррис сайловдаги мағлубиятидан кейинги илк нутқида Трампни танқид қилди
АҚШнинг собиқ вице-президенти ва Доналд Трампнинг 2024 йилги сайловдаги рақиби мағлубиятидан кейинги биринчи катта нутқида Доналд Трамп ва унинг маъмуриятини мамлакатга цензура ва рецессия билан таҳдид қилувчи, ўйловсиз сиёсати учун танқид қилди. Унинг нутқи Трамп президентлигининг 100 кунлигига тўғри келди.
Хусусан, у Трампнинг божлар бўйича сиёсати «Америка президентлигининг замонавий тарихидаги энг йирик қўлда яратилган иқтисодий инқироз» эканини таъкидлади.
«Баъзи одамлар сўнгги ойларда содир бўлган воқеаларни мутлақ хаос деб таърифламоқда. Ва, албатта, бунинг сабабини тушунаман. Бу, албатта, ушбу тарифлар туфайли. Тарифлар – мен олдиндан айтганимдек – рецессияга олиб келиши тайин», – деди Ҳаррис.
У аҳолининг кундалик харажатларини ошириши, пенсия ҳисоблари ва кичик бизнесга таъсир қилиши мумкин бўлган ушбу сиёсатга очиқчасига қарши чиқаётган америкаликларни олқишлади.
Ҳарриснинг сайловдаги мағлубиятидан кейинги биринчи чиқиши Сан-Францискода аёлларга сиёсий карьера қуриш ва сайловда қатнашишга ёрдам берадиган Emerge America ташкилотининг тантанали тадбирида бўлиб ўтди.
Камала Ҳаррис Трампнинг иқтисодий кун тартиби билан чекланмасдан, унинг бутун президентлик дастурини «[Трамп жамоаси] ҳақиқатни айтганларни жазолайдиган, садоқатлиларни рағбатлантирадиган, ҳокимиятдан фойдаланиб бойлик орттирадиган ва бошқаларни ўз ҳолига ташлаб қўядиган Американинг тор, худбинона кўриниши» деб атади.
У агар ҳукуматдаги ўзаро тийиб туриш ва мувозанат тизими барбод бўлса, мамлакат конституциявий инқирозга юз тутишидан огоҳлантирган.
«Бу охир-оқибат ҳаммага таъсир қиладиган инқироз, чунки бу бизнинг асосий ҳуқуқ ва эркинликларимизни ҳимоя қиладиган, ҳар биримизга ҳукуматимиз қандай ишлаши бўйича овоз бериш ҳуқуқини кафолатлайдиган қоидалар энди аҳамиятга эга бўлмаслигини англатади», – деди собиқ вице-президент.
Демократик маъмурият Оқ уйни тарк этганидан сўнг, Камала Ҳаррис омма қаршисида деярли кўриниш бермаётганди. Ўзининг айтишича, Трампнинг иккинчи муддати бошланганидан бери унинг ҳаракатларига дадил қаршилик кўрсатаётган америкаликлар ва мамлакатда қонун устуворлигини қўллаб-қувватлашда давом этаётган судялар уни Сан-Францискода нутқи қилишга илҳомлантирган.
«Катта эҳтимол билан, вазият яхшиланишни бошлашдан олдин янада ёмонлашади. Аммо биз бунга тайёрмиз», – деган Ҳаррис ўз нутқи якунида.