“Сурхон” устози “Пахтакор” устидан қозонилган муҳим ғалаба ҳақида гапирди
“Ўйин бўлимлар кесимида тактик характерда ўтди”
“Пахтакор”нинг вертикал ва узоқ узатмалар орқали ўйнайдиган жамоа эканлигини яхши билардик. Шунинг учун ҳужумларига қарши кураша олдик.
Танаффусда йигитларга: “имкониятлар бўлади, фойдаланиш керак”, дегандик. Яримта вазиятдан ҳам унумли фойдаланганимиз жуда яхши бўлди.
Гол ўтказиб юборганимиз, албатта, хурсанд қилмади. Бундай вазиятларда тўпни эгаллаш пайтида охиригача ўйнамаяпмиз. Шу билан бирга, захирадан тушганлар ўйинга керакли даражада таъсир ўтказа олишмади.
Шунга қарамасдан, жамоамни табриклайман. Мухлисларимиз ҳам шодликни биз билан бирга нишонлаш учун келди — бу жуда муҳим.”
“22 йилдан кейин Термизда “Пахтакор” устидан ғалаба – тарихий воқеа”
“Бу натижа нафақат очко жиҳатидан, балки тарихий нуқтаи назардан ҳам жуда муҳим. 22 йилдан сўнг Термизда “Пахтакор” устидан ғалаба қозониш — катта воқеа.
Бунга албатта, мухлислар, жамоа, штаб бирга ҳаракат қилиб эришдик. Барчага раҳмат.”
“Ўнг қанотда фаоллик паст, мувозанатни тиклаш керак”
Журналистнинг ўнг қанот ўйини бўйича саволига Давлетов очиқча муносабат билдирди:
“Бу муаммо аввалги — “Машъал”га қарши учрашувда ҳам кўзга ташланган эди. Ҳар икки қанотда ҳам бир хил куч билан ўйнаш шарт. Фақат чап қанот орқали ҳужум қилиш етарли эмас.
Суннатуллоҳ Ҳамиджонов ва Суннатилла Пойоновда қандайдир дискомфорт ёки ишончсизлик бордек. Ҳужумдаги фаолликни кўпроқ талаб қиляпмиз. Йигитлар бунга жавоб беришлари керак.”
“Пахтакордан кутганим шу эди, режамиз иш берди”
Февзи Давлетов Кубокдаги ротация ва “Пахтакор”га қарши тайёргарлик юзасидан ҳам тўхталиб ўтди:
“Кубокда асосий таркибдаги бир неча ўйинчиларни дам олдирдик. Бу қарор “Пахтакор”га қарши 100 фоиз эътибор қаратиш учун қилинган эди.
Ўйин олдидан қандай ўйин кутган бўлсам — айнан шундай бўлди. “Пахтакор”дан сюрприз бўлмади. Биз уларни синчиклаб таҳлил қилгандик.
Жамоавий ҳаракатимиз, тайёргарлик ва интизом муваффақият олиб келди. Йигитларга раҳмат — улар қўлимиздан келганини кўрсатишди.”
Хулоса ўрнида…
“Сурхон”нинг “Пахтакор” устидан қозонган ғалабаси нафақат очколар жиҳатидан, балки психологик жиҳатдан ҳам жамоа учун катта руҳлантирувчи туртки бўлди. Февзи Давлетов жамоанинг камчиликларини ҳам яширмай, очиқ гапириши билан мураббий сифатида конструктив ёндашув намоён этди.
Сиз нима деб ўйлайсиз — “Сурхон” ушбу ғалабадан сўнг юқори ўринлар учун кураш олиб боришда доимий иштирокчига айланиши мумкинми?