Путин ўз ишининг қийинчиликлари ва мамлакат келажаги ҳақида фикр билдирди
Бу ҳақда у Саида Медведева ва Павел Зарубин тайёрлаган «Россия. Кремль. Путин. 25 йил» номли ҳужжатли фильмда айтиб ўтган.
«Албатта, ҳар қандай масъулиятли лавозимда бўлганидек, президентликда ҳам ўз мураккабликлари бор. Масалан, иш куним кўп ҳолларда кечасигача чўзилиб кетади. Шундай пайтларда энг кўп азият чекадиган томонлар – оилам ва яқинларимдир. Аммо мен шу билан бирга ўз ишимнинг давлат ва халқ учун муҳимлигини, бажараётган ишларим менга катта мамнуният олиб келишини ҳис қиламан. Ана шу ҳислар ишдаги қийинчиликларнинг ҳаммасини қоплаб кетади», – деди Россия етакчиси.
Президент Путин келажакда ўзининг вориси масаласига ҳам тўхталди. Унинг фикрича, Россияда ҳокимиятни халқ ишончини қозонган шахсга топшириш жуда муҳим. Шунингдек, у келажакда бир эмас, бир нечта муносиб номзод пайдо бўлиши ва бу номзодларнинг ҳар бири россияликларнинг ишончини қозониши зарурлигини таъкидлади.
«Бирор киши мамлакатни бошқариш учун халқнинг ишончини қозонмаган бўлса, у жиддий ва катта ишлар қилиш имкониятига ҳам эга бўлмайди. Шу боисдан, мен ворис ҳақида ўйлаганимда – ва бу масала ҳақида доим бош қотираман – халқимизнинг ишончини қозона оладиган кўплаб шахслар пайдо бўлиши, улар орасида халқ танлов имкониятига эга бўлиши керак, деб ўйлайман», – деди Владимир Путин.
Шу билан бирга, Путин Россиянинг демографик вазияти ҳақида ҳам муҳим фикрларни айтди. Унинг айтишича, мамлакатнинг ҳозирги аҳолиси тахминан 150 миллион кишини ташкил қилади, аммо бу кўрсаткич мамлакат учун етарли эмас.
«Бизда янги ҳудудларнинг қўшилиши билан аҳоли сони ҳозирча аниқ ҳисоблаб чиқилмади. Ҳозирча бу рақам тахминан 150 миллион киши атрофида бўлиши мумкин. Аммо бу Россия каби катта мамлакат учун етарли эмас, бизда аҳоли кўпайиши лозим. Чунки айнан демография масаласи мамлакатимиз салоҳияти ва келажагининг асосини ташкил этади», – дея таъкидлади Путин.
Президентнинг таъкидлашича, давлатнинг мустаҳкам бўлиши, иқтисодий ўсиши ва жаҳон саҳнасидаги ўрни айнан демографик вазиятнинг яхшиланишига боғлиқдир. Шунинг учун у келгусида аҳоли сонини ошириш бўйича муҳим чоралар кўрилиши кераклигини қайд этди.
Россия етакчиси ушбу фикрлари билан мамлакатдаги долзарб муаммолар ва уларнинг ечими ҳақида ўз қарашларини билдирар экан, ўз фаолияти билан боғлиқ кўплаб жиҳатларни ҳам очиқ ҳолда муҳокама қилди. Унинг бу фикрлари кенг жамоатчиликнинг диққатини жалб қилди.