India dhe Pakistani vazhdojnë shkëmbimin e zjarrit

India ka kryer sulme me dronë në Pakistan më 8 maj, duke plagosur katër ushtarë tha ushtria pakistaneze. India, ndërkaq, i akuzoi fqinjin e saj për një tentim për sulm, teksa tensionet janë rritur mes dy fuqive bërthamore.

India e pranoi se ka shënjestruar sistemin e mbrojtjes ajrore të Pakistanit dhe Islamabadi tha se ka rrëzuar disa dronë. India, në anën tjetër tha se ka “neutralizuar” përpjekjet e Pakistanit për të goditur caqe ushtarake. Asnjë nga këto pretendime nuk kanë mundur të verifikohen në mënyrë të pavarur.

Akuzat e ndërsjella vijnë një ditë pasi India sulmoi me raketa disa lokacione në Pakistan, duke vrarë 31 civilë, sipas zyrtarëve pakistanezë. Nju Delhi tha se sulmet ishin hakmarrje për sulmin e armatosur që vrau 26 persona muajin e kaluar në pjesën e Kashmirit, të kontrolluar nga India. Ky shtet ka akuzuar Pakistanin se qëndron prapa këtij sulmi, por Islamabadi ka mohuar se ka gisht në të.

Që atëherë, të dyja palët kanë këmbyer zjarr në Kashmir, dhe Pakistani ka pretenduar se ka vrarë dhjetëra ushtarë indianë, por India nuk ka konfirmuar diçka të tillë.

Kryeministri pakistanez, Shehbaz Sharif, është zotuar se do të hakmerret për sulmet ajrore të Indisë, duke rritur frikën se të dyja shtetet po shkojnë drejt një konflikti të plotë. Udhëheqësit nga të dyja shtetet po përballen me presion që të tregojnë fuqi dhe të hakmerren për sulmet, teksa udhëheqësit kanë ashpërsuar retorikën.

Të dyja shtetet janë në konflikt për Kashmirin. India dhe Pakistani kanë zhvilluar tri luftëra për këtë rajon në Himalaje, që është i ndarë mes tyre dhe që pretendohet nga dy shtetet.

Pas rritjes së tensioneve, India ka evakuuar mijëra njerëz nga fshatrat në kufirin në rajon. Ndërkaq, afër 2.000 banorë janë larguar nga shtëpitë e tyre në Kashmirin e administruar nga Pakistani.