Ханс-Дитер Флик: «Тўртта “Эл класико”да ғалаба қозониш – бу тарихий натижа, лекин...»

Испания Ла Лигасининг 35-турида энг муҳим ва катта қизиқиш уйғотган беллашув – "Барселона" ва "Реал" ўртасидаги навбатдаги "Эл класико" бўлиб ўтди. Ушбу беллашув нафақат иккала жамоа, балки бутун футбол олами эътиборини ўзига жалб қилди. Натижада мухлислар ҳақиқий футбол спектаклининг гувоҳига айланишди.

Тўпурарликка бой ва кескин кечган учрашувда мезбонлар – "Барселона" ўз характерини кўрсатиб, 4:3 ҳисобида иродали ғалабани қўлга киритди. Бу ғалаба орқали каталонияликлар ўзининг чемпионлик сари интилган йўлида катта қадам ташлади.

Учрашувдан сўнг, "Барселона" бош мураббийи Ханс-Дитер Флик матбуот билан мулоқотда ғалабанинг муҳимлиги ва жамоанинг келажакдаги режалари ҳақида ўз фикрлари билан ўртоқлашди.

«Биз бу мавсумда "Реал" билан ўтказган барча тўртта "Эл класико"да ғалаба қозондик. Бу биз учун тарихий ва муҳим натижа. Ҳар бир ғалаба мухлисларимиз учун алоҳида аҳамиятга эга. Лекин биз ҳозир бундан ортиқча қувониб кетмасдан, олдиндаги учрашувларни ҳам муваффақиятли якунлаш ҳақида ўйлашимиз керак», – деб таъкидлади мураббий.

Флик, шунингдек, жамоасининг ўйинидан мамнун эканлигини, бироқ майдонда хатолардан қочиб бўлмаслигини ҳам айтиб ўтди:

«Албатта, мен доим ҳам очиқчасига қувонишимни билдирмайман, аммо жамоам намойиш этаётган футбол менга маъқул келмоқда. Футбол хатоларсиз бўлмайди. Бизнинг асосий вазифамиз – ана шу камчиликлар сонини иложи борича камайтириш ва янада кучли ўйин кўрсатишдир», – дея қўшимча қилди каталонияликлар устози.

Эслатиб ўтамиз, ҳозирда Испания чемпионатида мавсумнинг якунланишига уч тур қолган ҳолда, "Барселона" 82 очко билан турнир жадвалида етакчилик қилмоқда ва энг яқин рақиби "Реал" клубини 7 очкога ортда қолдирган. Агар каталонияликлар кейинги турда "Эспаньол" устидан ғалаба қозонса, муддатидан олдин чемпионликни расман расмийлаштириши мумкин бўлади.