Польша Россияни катта савдо марказидаги ҳалокатли ёнғинда айбламоқда: вазирлик сенсацион баёнот берди
Бу ҳақда Польша адлия вазири Адам Боднар ва ички ишлар вазири Томаш Семоняк биргаликда ўтказган матбуот анжуманида маълум қилди. Улар томонидан билдирилган баёнотга кўра, мазкур ёнғин Россия махсус хизматлари томонидан буюртма қилинган ва у аниқ режалаштирилган ўт қўйиш орқали амалга оширилган.
Вазирларнинг таъкидлашича, ёнғинни ташкиллаштириш билан боғлиқ айрим гумондор шахслар аллақачон ҳибсга олинган ва тергов жараёнида муҳим далиллар қўлга киритилган.
«Ҳозирги вақтда тўпланган маълумотларга кўра, ушбу даҳшатли воқеанинг батафсил режаси ва уни амалга ошириш бўйича кўрсатмалар Россия ҳудудида жойлашган шахс томонидан тайёрлангани аниқланди. Биз ёнғинни уюштиришнинг бутун тартибини, жиноятчиларнинг ҳаракатларини, ҳатто улар томонидан воқеа қандай ҳужжатлаштирилганига оид аниқ далилларга эгамиз», — деди вазирлар баёнотида.
Эслатиб ўтамиз, ушбу ҳалокатли ёнғин оқибатида савдо маркази деярли бутунлай вайрон бўлди. Олов 63 минг квадрат метр майдонни ўз домига тортган ва бинодаги қарийб 1400 нафар ижарачига тегишли дўкон ва павильонлар бутунлай куйиб, миллионлаб долларлик иқтисодий зарар етган. Ёнғин билан боғлиқ ёнғин ўчириш ишлари беш соатдан зиёд вақт давом этган ва уни назоратга олиш жуда қийин кечган.
Мутахассислар ҳам воқеа жойини текшириш натижасида ёнғиннинг ўта тез ва катта кўламда тарқалганига эътибор қаратишди. Улар бу даражадаги ёнғин табиий ҳолат ёки тасодиф натижасида юз бериши амримаҳол эканини таъкидлаб ўтган эди. Терговчилар ва экспертлар айнан шу жиҳатларга асосланиб, бу ёнғин атайлаб уюштирилган деган хулосага келишди.
Польша ҳукумати ушбу воқеа юзасидан барча далилларни халқаро ҳамжамиятга тақдим қилишни ваъда қилди. Ҳозирча Россия томонидан бу айбловларга расмий муносабат билдирилмаган.
Польшалик вазирларнинг кескин баёнотлари икки давлат ўртасидаги дипломатик муносабатларни янада таранглаштириши эҳтимолдан ҳоли эмас. Халқаро экспертлар ҳам вазиятни диққат билан кузатмоқда.
Zamin.uz таҳририяти мазкур вазият ривожини кузатиб боради ва ўқувчиларга бу ҳақидаги энг сўнгги янгиликларни тақдим қилиб туради.
Фото: Варшавадаги савдо марказида юз берган ёнғин / Х / лукОлежник