“Сыйға тартылған балалар“: Қарағандыда сәбилерге қатысты атышулы іс қайта сараланды
Қарағанды облысының прокуратурасы жаңа туған сәбилерді беру ісі бойынша қылмыстық істің бабы өзгергенін мәлімдеді. Енді бұл сатып алу-сату емес, "сыйға тарту" ретінде қарастырылады, - деп хабарлайды Tengrinews.kz тілшісі.
Қазір сот алдында биологиялық ана, перинаталдық орталықтың мейірбикесі және екі отбасылық жұп отыр.
Қарағанды облысы кәмелетке толмағандардың істері жөніндегі мамандандырылған ауданаралық сотында екі отбасы, биологиялық ана және перинаталдық орталықтың мейірбикесіне қатысты қылмыстық іс қаралып жатыр. Бастапқыда олар жаңа туған сәбилерді сатып алу-сату дерегі бойынша айыпталған болатын: тергеу нұсқасы бойынша, әйел екі баласын бала көтере алмаған отбасыларға берген, ал мейірбике оған көмектескен.
Кеше сот отырысында прокурор Нұрбек Құсбақов жаңа айыптау актісін оқып берді. Ол Қылмыстық кодекстің 135-бабына сәйкес, жауапкершілік тек сатып алу-сату ғана емес, кәмелетке толмағандарға қатысты басқа да мәмілелер үшін қарастырылғанын түсіндірді.
Осыған байланысты айыптау қайта сараланды: отбасылар - балаларды сыйға алғаны үшін, биологиялық ана - сыйға тартқаны үшін, ал мейірбике - делдалдық жасағаны үшін айыпталып отыр.
Прокурор бұрын сатып алу-сатуға қатысты болған барлық дәлелдер жаңа білікке сәйкес қайта қаралғанын айтты.
Сот материалдарына сәйкес, күдіктілердің бірі - облыста тұратын көп балалы ана. Ол 2022 және 2023 жылдары екі бала дүниеге әкеліп, кейін перинаталдық орталықта істейтін таныс мейірбике арқылы оларды бала көтере алмаған отбасыларға берген. Тергеу нұсқасына сай, әйел мұндай қадамға қаржылық қиындықтарға байланысты барған және болжам бойынша, мейірбикемен бірге балалар үшін алты миллион теңге алған.
Айыпталушылар бала саудасына қатысты айыптауларды жоққа шығарады. Биологиялық ана балаларын ақысыз түрде бергенін, себебі оларға лайықты өмір қамтамасыз ете алмағанын және қоғам тарапынан қысымнан қорыққанын айтты. Мейірбике тек көмектескісі келгенін мәлімдеді. Отбасылар да балалар үшін ақша төлемегендерін алға тартады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!